2,421 Бардыгы /

Чынында ошондой эле болду. Өспүрүмдөрдүн спорт мектебинин ачылышы ачык айтканда унутулгус да, эсте калаарлык да окуялардан болуп калды. Бирок, эки гектардан ашуун аянты бар стадионго аюуну жыккан атактуу балбан Жүзү Акматалиевдин аты аталбай, жок дегенде көрнөк жарнагы илинбей калганы өкүнүчтүү болду. Капчыктуулар көкөлөп, капчыксыздар чөгөлөп калабы? Спорт зал толук бүткөрүлгөн. Ага жаплы 7,5 млн сом акча корогон. Анын 4,5 млн сомун саясатчы К.Ташиевден, 1,5 млн сомун АРИСтен, 1 млн сомун чектөө кредитинен алып, 500 миң сомун Кызыл-Сеңир элинен чогултуп, уюштуруу иштерин Жогорку Кеңештин депутаты Тазабек Икрамовдун жүргүзгөндүгү чындык. Спорттук мектептин аты анын атасы Икрам ажыга коюлуп жаткандыгы да бир жагынан кубанычтуу. Жогорку Кеңештин депутаттары Төрөбай Зулпукаров, Максат Эгембердиев, айылдын жашы-карысы, дежур чалдардын кешигин таткандар да Тазабекти өлө макташты. Ал эми Жогорку Кеңештин экс-депутаты, мамлекеттик ишмер Камчыбек Ташиевдин сөзү чогулгандарга жакты. Анткени анын бул спорт залдын курулушуна кошкон 4,5 млн сомдук салымын калыстык үчүн болсо да Өнүгүүдөн өгөйлөп, КСДПга жармашкан Тазабек Икрамов деле айтып коё албады. Анан К.Ташиев элге отчет катары бул салымын өзү айтты. Дегинкиси мындан 16 жыл мурда алты кулунунан  ажырап, аксылыктар аза күтүп жатышса Тазабектин атасынын көкөлөтүп макташып, бир жагынан чардашып, тойлошуп жаткандыктары акылга сыябы? Капчыктуулар ушинтип каалаганын жасай беришеби?

Рыспай Жумабеков, журналист.