9,682 Бардыгы /

Учурда бул жыл аяктап, келээрки жылдын пландары түзүлө баштаган чагы. Ал эми Жалал-Абад шаардык кеңешинин төрагасы жана шаар мэри жаңыланганына 3 айдан ашуун убакыт болгону жалпыга маалым. Бул аралыкта төрагалыкты аркалаган мырза эмне жумуш аткарып, кандай маанилүү чечимдерди кабыл алды экен. 2014-жылдын отчётун кандай тапшырат болду, же болбосо кар жаады, из басты болуп, ЭКСтердин отчёту калып, жаңылар өзүнүкүн жаап кетет бекен деген суроолор бизди да кызыгууга үндөдү. Андыктан бул суроолордун жообун Жалал-Абад шаардык кеңештин төрагасынан.

-Нургазы Нурланович, айтсаңыз сиз төрагалыкка шайланып келгенден бери кандай маанилүү чечимдерди кабыл алдыңыз?

-Бул аралыкта шаардык кеңеште бир эле сессия өткөрдүк жана анда маанилүү чечим кабыл албадык Бирок, жергиликтүү элдер менен жолугушуп, көйгөйлөрүн тактап, кээ бир маселелерди ордунда чечүүгө аракет кылдык. Мында шаардагы кайсы гана ишкана болбосун баарынын жетекчилери жана мэр баш болуп бирге барышты.

-Бул жолугушууңуз керектүү жетекчилер жана мэрдин катышкандыгы менен эле өзгөчө болбосо адатта жылда болчу жолугушуу. Бирок көңул жарытаарлык майнап чыкпай келет.

-Туура. Жылда сиз айткандай болуусу мүмкүн. Бирок быйыл жылдагыдай болбойт. Элдин орчундуу көйгөйлөрү учурда бюджетте каралып жатат. Анын жыйынтыгын мэрия бергенден кийин кайрадан талдап, карап чыгабыз. Эгер алардын ичинен бюджетке кирбей калгандары болсо себебин тактайбыз. Анан кайрадан эле эл менен жолугушуп отчётун беребиз. Соңунда аткаруучуларды көзөмөлдөп, иштин бүтүшүн талап кылабыз. Буйруса буларды жыйынтыксыз калтырбайм.

-Бир канча убакыт шаардык кеңеш төрагасыз отурушту. Учурда жыл аяктап калбадыбы, отчёт бермейге келгенде кандай болот? 1-2 сессия өткөрдүм деп, ошонун гана отчётун берип койсоңуз 1 жылдык кылынып, кылынбаган иштердин отчётун ким берет?

-Ырас, М.Тагаевден кийин мен келдимби анын иштерин улантып кетиш менин мойнумда. Отчётту да ошого карап берем. Бирок, мурун анын аткарган иштерин башка, өзүмдүкүн башка берем.

-Жогоруда бир эле сессия өткөрдүм деп жатпайсызбы. Буга чейин фракциялардын ортосунда пикир келишпестиктер бар эле, азыр токтодубу?

-Акыркы сессияны тынч, кайым айтышуусуз эле өткөрдүк. Мурункудай кризис жок. Өзүңөр билгендей 31 депутаттын колдоосу менен келгенмин. Азыр анын баарысы ынтымакта эле иштеп жатышат. Сессиядан соң депутаттар жакшы өткөрүп бердиң дешти.

-Мэр өз ишин баштаганына 3 айдан ашык убакыт болду. Ишмердүүлүгүнө кандай баа бердиңиз?

-Негизи аракетчил эле киши экен. Техникалар келип, шаар тазалана баштады. Учурда бюджет каралып жатат. Анын жыйынтыгы менен дагы көрөбүз кандай экенин. Азырынча мэрдин артынан эчнерсе чыга элек.

Санрабия САТЫБАЛДИЕВА, “Аймак”