3,564 Бардыгы /

22-январдан 25-январга чейин Сузак районунун Кара-Дарыя айыл аймагынын окуучулары үчүн 3 күндүк мотивациялык тренинг өтүүдө.

Аталган тренинг «Кара-Дарыя» жаштар коомунун мүчөлөрү тарабынан уюштурулуп, тренингди анын мүчөлөрү өтүшүүдө.

“Күнүбүздө семинар, тренинг, форумдардан калбай катышып, социалдык тармактарга реклама кылып, бирок илимине амал кылбаган жаштар толтура. Ошолордун катарын толуктап калбоо максатында, “Кара-Дарыя” жаштар коомунун мүчөлөрү, университетте жана тренинг, форумдардан алган билимдерин окуучулар менен бөлүшүү максатында атайын үч күндүк тренинг уюштурдук. Өз кесибин таппай, максатына жетүүнүн жолун издеп жүргөн ини-карындаштарыбызга бир аз да болсо пайдабыз тийип жана да алган илимибиз жугумдуу болуусунун жолунда талбай аракет кылып жатабыз.

Биз окуучуларга мотивациялык өбөлгө түзүү менен бирге өзүбүз да тренинг өтүүнү өздөштүрүп жатабыз. Жардам берүү-бул бир гана материалдык жактан гана эле эмес,бул күч кубатың болсо, күчүң менен, билимиң болсо билим менен, өнөрүң болсо аны менен кыскасы колуңдан эмне келсе ошону менен жардам берүү Жаратканга жаккан иш. Ошондуктан “Кара-Дарыя” жаштар коому тренинг же кандайдыр бир иш-чараларды өткөрүү үчүн атайын демөөрчү издеп, акчанын көзүн карап отура бербей колдон келген иш аракетин көрүп жатат. Буюрса алдыда коомубуздун урааны болгон “Айылды өнүктүрүү ар бирибиздин милдетибиз” деген сөздү айылыбыздын ар бир жаранынын жүрөгүнө жеткирүү жана иш жүзүндө көрсөтүү” – дейт, Ысхак Мадимаров “Кара-Дарыя” жаштар коомунун төрагасы.

Аталган тренинг окуучулардын сабактарына тоскоол болбогон таризде ылайыкталган. График боюнча: 14:00дөн 15:00гө чейин тренинг, 15:00-15:20дө суроо-жооп, 15:20-15:40 кыска мотивациалуу кинолор, 15:40-16:00гө чейин пайдалуу оюндар ойнотулду. Тренингте өтүлгөн темалар: илим алуунун зарылдыгы; убакытты туура пайдалануу; кесип тандоо; Кыргызстандагы университеттер боюнча маалымат; оратордук өнөр.

Белгилей кетсек, “Кара-Дарыя” жаштар коому 2017-жылы жигердүү жаштардын демилгеси менен ачылып, бүгүнкү күнгө чейин өз ишмердүүлүгүн жүргүзүп келүүдө.

Бүбүсара ОРОЗАЛИЕВА, “Аймак”