Аймак

ЖАЛАЛ-АБАДДА АТА МЕКЕНДИ КОРГООЧУЛАР КҮНҮ БЕЛГИЛЕНДИ

ЖАЛАЛ-АБАДДА АТА МЕКЕНДИ КОРГООЧУЛАР КҮНҮ БЕЛГИЛЕНДИ

 4,893 Бардыгы /

ЖАЛАЛ-АБАД. 22-февралда Ата Мекенди коргоочулардын күнү белгиленди. Ага Күч түзүмдөрүнүн кызматкерлери, ардагерлери, 704-аскер бөлүктүн аскерлери жана мекеме, уюмдардын жетекчилери, жарандар катышты.

Анда Өкмөттүн ыйгарым укуктуу өкүлүнүн орун басары Мамасалы Акматов, шаардын мэри Мураталы Тагаев куттуктоо сөздөрүн айтышты.

Баарыбыз билгендей армиябыз канчалык күчтүү болсо өлкөбүздөгү, областыбыздагы тынчтык ошончолук бекем жана туруктуу болот. Чептен эрдин күчү бек демекчи кыргыз элибиздин эр жигиттери чептей бекем болуусуна тарбиялап, катуу талап коюп келген. Алар үй-бүлөнүн ишенген тиреги. Кыйын сыноолордо майтарылбас кайраттуулуктун, каармандыктын гана символу болбостон, адамдарга сый мамилеси менен ыймандуулугу менен да үлгү көрсөтүүгө тийиш. Мамлекетибиздин тынчтыгы, биримдиги жана бүтүндүгү биздин эр-азаматтардын мойнундагы жоопкерчилиги деп билем. Ата Мекенди коргоочулардын күнү армияда катаал кызмат өтөшкөн эрктүү адамдардын гана эмес, бүгүн ар бирибиздин бейкутчулугубузду жана тынчтыгыбызды сактап катарда кызмат өтөп тургандардын дагы майрамы”,-дейт Мамасалы Акматов Өкмөттүн ыйгарым укуктуу өкүлүнүн орун басары.

Жалал-Абад шаардык мэриясынын жана жеке өзүмдүн атымдан 23-февраль Мекенди коргоочулар күнү менен чын жүрөгүмдөн куттуктаймын. 2003-жылдан бери жыл сайын мекенди коргоочулар күнүн салтанаттуу майрамдап келе жатабыз. Буга чейин бул мырзалардын гана майрамы делип келген, бүгүнкү күндө бул нерсе калып бара жаткандай. Себеби азыр күч түзүмдөрүндө мекендин милдетин мойнуна алып айымдар дагы кызмат кылууда. Ошондуктан барган сайын бул майрамдын баалуулугу артып жатат”,- деди Мураталы Тагаев Жалал-Абад шаарынын мэри.

Иш-чаранын алкагында күч түзүмдөрүндө мыкты кызмат кылгандар сыйланышты. Сыйлык алган 704-аскер бөлүктүн штаб башчысы, гвардиянын майору Тиллабердиев Муратали кызматында чын дилинен кызмат кылган гана сыйлыктарга татырын белгиледи.

Бүгүнкү күн негизинен аскер кызматкеринин эмес, ар бир жарандын майрамы болуп эсептелет. Бул тармакта иштеп келе жатканыма 16 жыл болду. Аскер кызматкери кайсыл жерде болбосун, мамлекетти, элди коргошу керек. Бизде жөндөн жөн эле сыйлыкка татыктуу болушу мүмкүн эмес. Себеби чын дилиңден аракет кылып кызмат кылганыңда гана  сыйлыкка татый аласың”,- дейт ал өз сөзүндө.

Андан соң аскерлерге ыр-бийлер коюлуп, концерттик программа менен жыйынтыкталды.

Акылай КАРАБАЕВА, “Аймак”

Автор

Байланыш дареги

Email: aymak.kg@mail.ru

Телефон: +996 (770) 81-00-32

Факс: +996 (3722) 2-32-36

Адрес: Жалал-Абад ш. Ленин к. 17