3,459 Бардыгы /

Сузак райондук маданият бөлүмүнүн башчысы өткөн жылдын октябрь айында жумуштан кеткен. Андан бери 6 ай убакыт өткөнүнө карабай, анын ордуна башка башчы дайындала элек.

Маянасы аз бул кызматка келем дегендердин саны арбын. Маданият министрлиги жарыялаган биринчи сынакка төрт талапкер катышып, эч ким өтпөй калган. Эми экинчи сынакка ашык-кеми жок 6 талапкер документ тапшырып, жетиштүү бал алып, жеңүүчү деп Умсунай Кадыркулова табылган. Бирок райондук маданият бөлүмүнүн кызматкерлери Кадыркулова менен иштеше албайбыз деген кайрылуусун президентке чейин жолдогон. Ошол себептүү райондун акими Эрмекбай Омошев анын талапкерлигин министрликке сунуштаган эмес. Умсунай Кадыркулова ушул себептүү кызматка келбей калган, бирок булиш-аракетти мыйзамсыз деп эсептейт.

-“Сынактан өткөндөн кийин акимге кирсем, сиздин үстүңүздөн арыз түшүптүр, кызматка коё албайбыз деди. Карасам ал, арыз эмес эле кайрылуу экен. Маданият бөлүмүнүн кызматкерлери мени менен иштеше албашын, мурдагы жетекчисин кайтып келүүсүн суранган экен. Анан да кол койгондор башка кагазда жазылыптыр, булжерде белгтлүү бир топтун эле кызыкчылыгы бар. Анткени Сузак маданият кызматкерлери мени тааныбай туруп кантип иштеше албайбыз дешсин. Менин маданият тармагын көтөрөйүн деген жакшы программаларым бар, маданият кызматкерлерин айлык акыын жогорулатайын деген ниеттер менен аттангам. Аким мага 31 адамдын нааразы кылып сизди ишке ала албайм. Дагы бир негизи сиз маданият тармагында иштеген эмес экенсиз деди. Менин бул тармакта жетиштүү билим тажрыйбам бар”.

Ал эми Сузак районунун акими Эрмакбай Омошев ким болгонуна карабай маданият тармагын түшүнгөн адам келсе, иштешүүгө даяр экендигин билдирди.

Ошондой эле, маданият кызматкери БазарбайМадоморов ушунча убакыттан бери маданият бөлүмүнүн башчысы дайындалбай жаткандыгын бөлүмдүн мурдагы жетекчисине байланыштырат.

-“Мында жергиликтүү бийликтин да министрликтин да күнөөсү жок. Мурдагы жетекчи кызматтан кеткенин 2-3 айга чейин билдирбей жүрө берген, эгерде 15 күнгө чейин билдиргенде аким министрликке сунуш берип дайындалып калмак экен. Андай болбогондуктан,

мамлекеттик кадр кызматы сынак жарыялады, ал да узап эки жолу өттү. Экинчисинде 6 адам тапшырдык, министрликке барып, компьютерден тесттен өттүк. Умсунай Кадыркулова ийгиликке жетишип, ага ак жол каалап келгенбиз. Ал өткөндөн кийин маданият тармагында иштебегендиги чыгып, ага кызматкерлер нааразы болду. Эми чечим премьер министрде калды, ал дайындалсын же башынан сынак өткөрүлсүн деген жообун айтыш керек”.

Маданият бөлүмүнүн башчылыгы кимге буйруйт аны убакыт көрсөтөт. Учурда Улангапыр Тагаев Сузак райондук маданият бөлүмүнүн башчысынын милдетин аткаруучу болуп иштеп жатат.

Роза АКМАТЖАН кызы, “Аймак”