1,951 Бардыгы /

Базар-Коргон районундагы “Дашман” мамлекеттик жаратылыш коругу коргоого жана жергиликтүүлөр тарабынан аяр мамилеге муктаж. Мына ушул үчүн аталган жайда токой баалуулуктарын сактоо максатында «Парктар маршы» уюштурулду.

29-май күнү Жалал-Абад областынын Базар-Коргон районуна караштуу Дашман мамлекеттик жаратылыш коругунда жалпы 100 гө чукул токойчулардын, экологдордун жана мектеп окуучуларынын, жергиликтүү тургундардын катышуусунда токойго экскурсия уюштурулду. Ошондой эле аймактагы дарак жана өсүмдүктөрдүн түрлөрү, алардын жашын, көмүртек суммасын аныктоо боюнча мастер-класстар, кичи эксперименттер жүргүзүлдү.

Кошумчалай кетсек, парктар маршы акциясы июль айына чейин созулуп, 10 мамлекеттик жаратылыш коруктарын, 12 мамлекеттик жаратылыш парктарын жана Ысык-Көл биосфералык зонасында өткөрүлмөкчү. Ал эми  “Дашман” жаратылыш коругунун жетекчиси Кочкорбай Калдарбаев алгачкы иш-чаралардын бири Базар-Коргондо өтүп жатканы максатка ылайык болду дейт.

“Жаш муундарга токойду сактап калуу тууралуу байма-бай иш-чара уюштуруу абзел. Анткени жаңгак-мөмөлүү  токой аянты болгон “Дашман” коругунда өзү өсүп чыккан дарактар негизги бөлүгүн түзөт. Бүгүнкү күндө аларды сактап калууга муктажбыз”.

Токой баалуулуктарын сактоо акциясы Германия эл аралык кызматташтык коомунун  «Кыргызстандын түштүгүндө жаңгак-мөмө токойлорду жана жайыттарды баш-карууга жергиликтүү жамааттарды катыштыруу аркылуу биологиялык ар түрдүүлүктү сактоо жана жакырчылыкты кыскартуу» долбоорунун алкагында Германия мамлекетинин каржылык жардамы, жана субсидия алуучу “CAMP Алатоо” Коомдук Фонду жана “Лесик Юг” Коомдук экологиялык уюму тарабынан ишке ашырылып жатат. Ошондой эле Курчап турган чөйрөнү коргоо жана токой чарбасы мамлекеттик агенттигинин Жалал-Абад аймактык башкармалыгы тарабынан колдоого алынган.

Роза АКМАТЖАН КЫЗЫ