2,052 Бардыгы /

            БИШКЕК. Бишкек шаарында Кытай Эл Республикасынын Төрагасы Си Цзинпиндин кыргыз тилинде басылып чыккан  «Мамлекеттик башкаруу жөнүндө» китебинин бет ачаары болуп өттү. Иш-чарага Кыргыз Республикасынын Президенти Сооронбай Жээнбеков дагы катышты.

            – Бир жумадан кийин Кыргызстандын жакын досу, кыргыз коому терең урматтаган дүйнөлүк лидерлердин бири – Кытай Эл Республикасынын төрагасы Си Цзиньпин мырзанын биздин өлкөгө мамлекеттик сапар жасайт. Бул визит Кыргыз-Кытай мамилелеринин жаңы тарыхый барагын ачат. Анткени, дал ушул тарыхый окуянын алдында, Си Цзиньпин мырзанын “Мамлекеттик башкаруу жөнүндө” фундаменталдуу эмгеги  кыргыз тилинде жарык көрдү. Саясий, маданий, философиялык мааниси терең жана глобалдуу маселелерди камтыган бул китеп – биздин коомго беш жыл мурда орус тилинде белгилүү эле. Эми минтип кыргыз тилинде окуган жарандарыбыз дагы бул уникалдуу китепти окуу мүмкүнчүлүгүнө ээ болушту. Кытайдын өнүгүү логикасын баамдоо, кытай коомунун терең философиясына негизделген мамлекеттик башкаруу ыкмасын түшүнүү үчүн бул китепти сөзсүз окуп чыгуу абзел! Анткени, дүйнөлүк алкакта зор кызыгууну жараткан бул китепти окурмандар жаңы кылымдын жаңы көз карашы катары кабыл алып, баалап жатышат. Си Цзиньпин мырзанын эмгеги Кытай элинин ийгиликтеринин сырын, дүйнөлүк аренадагы кытай феноменин, өлкөнүн концептуалдык философиясын, өнүгүү формуласын терең өздөштүрүүгө гана жол ачат, – деди Кыргыз Республикасынын Президенти Сооронбай Жээнбеков.

            Айтмакчы, «Мамлекеттик башкаруу жөнүндө» китебинин бет ачаары КЭР Төрагасы Си Цзинпиндин Кыргыз Республикасына мамлекеттик сапарынын астында уюштурулду. Иш-чарага ошондой эле экс-президент Роза Отунбаева, Кыргыз Президентинин Аппаратынын Жетекчиси Досалы Эсеналиев, вице-премьер-министр Алтынай Өмүрбекова, Жогорку Кеңештин депутаттары, Кытайдын Кыргызстандагы Элчиси Ду Дэвэнь, Кыргызстан жана Кытайдын илимий чөйрөсүнүн өкүлдөрү, мамлекеттик органдар, коомдук ишмерлер жана ЖОЖ студенттери катышты.

                        Алишер ТОКСОНБАЕВ, өз кабарчы