Аймак

ЧАТКАЛ ЖАНА АЛА-БУКАДА МИЛИЦИЯ ТАРАБЫНАН ЭСКЕРТҮҮ ТАКТАЙЧАЛАРЫ ИЛИНДИ

ЧАТКАЛ ЖАНА АЛА-БУКАДА МИЛИЦИЯ ТАРАБЫНАН ЭСКЕРТҮҮ ТАКТАЙЧАЛАРЫ ИЛИНДИ

 1,637 Бардыгы /

Жай мезгилинин аптаптуу күндѳрүндѳ сууга түшүү мезгили күч алат. Бул мезгилдик кѳрүнүшкѳ карата жарандардын жана айрыкча жаш ѳспүрүмдѳрдүн коопсуздуугун камсыздоо максатында милиция тарабынан ар түрдүү алдын алуу иш-чаралары ѳткѳрүлүүдѳ.

Чаткал РИИБнин Коомдук коопсуздук кызматы тарабынан Чаткал дарыясын бойлой бир катар эскертүү тактайчалары илинип, эл арасында түшүндүрүү иштери жүргүзүлдү. Себеби күн ысыган убакытта райондун кѳпчүлүк жашоочулары дал ушул дарыяга барып сууга түшүшѳт. Дарыядагы суунун кѳптүгү, агуу ылдамдыгынын тездиги адам ѳмүрүнѳ кооптуулук жаратат.

Андыктан ар бир ата-эне, айылдагы кайдыгер эмес жарандар райондогу жаш ѳспүрүмдѳрдүн сууга чѳгүп кетүү кырсыктарынын алдын алуу максатында ѳз балдарын кѳзѳмѳлсүз суу бойлоруна, кѳлмѳлѳргѳ жибербѳѳ керектиги эскертилди.

Ошондой эле жарандардын мас абалында сууга түшүп, чѳгүп кетүүсүнүн алдын алуу максатында эскертүү иш-чарасы ѳткѳрүлдү. Жаш ѳспүрүмдѳрдүн сууга түшүү, эс алуу учурунда алардын коопсуздугун камсыздоо үчүн тажрыйбалуу сууда жакшы сүзѳ алган адамдардын коштоп жүрүүсү айтылды.

Ушундай эле ѳспүрүмдѳр арасында суу кырсыктарынын алдын алуу боюнча түшүндүрүү иштери Ала-Бука РИИБи тарабынан жүргүзүлдү. Сууга чѳгүүлѳрдү болтурбоо максатында жүргүзүлгѳн иш-чаралардын алкагында район аймагындагы 8 айыл ѳкмѳткѳ, 45 мектепке, 29 балдар бакчасына, 36 ФАПка сунуштар берилип, жооптору алынды. Андан сырткары бир катар тиешелүү мамлекеттик кызматкерлер менен биргеликте эл арасында түшүндүрүү иштери жүргүзүлүп, берилген сунуштар боюнча иштин жүрүшү текшерилди.

Жалал-Абад ОИИБнин басма сѳз кызматы

Автор

Байланыш дареги

Email: aymak.kg@mail.ru

Телефон: +996 (770) 81-00-32

Факс: +996 (3722) 2-32-36

Адрес: Жалал-Абад ш. Ленин к. 17