Аймак

КАЗАКСТАН: ШАЙЛООНУН ЖЫЙЫНТЫГЫНА КҮМӨН ЖАРАТКАН МЫЙЗАМ БУЗУУЛАР АНЫКТАЛГАН ЖОК

КАЗАКСТАН: ШАЙЛООНУН ЖЫЙЫНТЫГЫНА КҮМӨН ЖАРАТКАН МЫЙЗАМ БУЗУУЛАР АНЫКТАЛГАН ЖОК

 852 Бардыгы /

Казакстандын Башкы прокуратурасы президенттик шайлоонун жыйынтыктарына күмөн жарата турган мыйзам бузууларды таппаганын билдирди.

«Казакстанда президенттик шайлоо учурдагы мыйзамдын нормаларына ылайык өттү», — деп жазылган мекеменин билдирүүсүндө.

Буга чейин Алматы шаарындагы жана Алматы облусундагы шайлоо тилкелерде иштеген байкоочулар алар топтогон маалыматтар менен расмий жыйынтыктоочу протоколдордун ортосунда бир топ айырмачылыктар бар экенин билдирип, социалдык түйүндөргө ыктымал мыйзам бузуулар тууралуу маалыматтарды жарыялашкан. Апта башында Алматыда байкоочулардан турган топтун мүчөлөрү шайлоонун жыйынтыктарын жараксыз деп таануу өтүнүчү менен сотко жана прокуратурага кайрылышканын билдиришкен.

«Прокуратура органдары бир катар маалымат каражаттары көрсөткөн жана социалдык түйүндөргө жарыяланган ыктымал мыйзам бузуу учурлары боюнча текшерүү жүргүзүп жатышат. Алардын көбү ырасталган жок», — деп жазылган Башкы прокуратуранын билдирүүсүндө. Мекеме видеотасмалардын көбүндө окуя кайсыл жерде болгондугу жөнүндө маалыматтар жок экенин белгилеп, эгер текшерүүнүн жыйынтыгында «мыйзам бузуу учурлары» аныкталса, алар боюнча маалыматтар сотко жөнөтүлө турганын билдирди.

Жалпысынан шайлоо өнөктүгү башталгандан бери прокуратура органдары тарабынан сотторго ыктымал мыйзам бузуулар боюнча 36 иш өткөрүлүп берилген. Анын жыйынтыгында аймактык шайлоо комиссияларынын 11 мүчөсүнө 63 125 теңге (165 долларга жакын) айып пул салынды. Алардын баары жарандардын башка адамдар үчүн добуш берүүсүнө жол берген деп айыпталышкан. Мындан тышкары тогуз шайлоочу башка бирөөнүн атынан же бир нече жолу добуш бергендиги үчүн айып пул төлөгөн.

9-июнда өткөн кезексиз президенттик шайлоодо Касым-Жомарт Токаев жеңишке жеткен. Ал 12-июнда ант берип, мамлекет башчысы кызматына киришкен. Батыш өлкөлөрүнөн келген байкоочулар Казакстандагы шайлоону сынга алып, бир катар мыйзам бузуулар болгонун белгилешкен.

Өлкөнүн Ички иштер министрлигинин маалыматына караганда, 9-12-июнь күндөрү өткөн митингдер маалында төрт миңге жакын киши кармалган. Алардын 680ге жакыны административдик камакка алынса, 305 адамга айып пул салынган.

www.

Автор

Байланыш дареги

Email: aymak.kg@mail.ru

Телефон: +996 (770) 81-00-32

Факс: +996 (3722) 2-32-36

Адрес: Жалал-Абад ш. Ленин к. 17