2,802 Бардыгы /

“Жеткинчек Ош” Кыргызстандын түштүгүндөгү жападан жалгыз балдар лагери. Бул жайга тээ алыскы Алай, Чоң-Алай, Өзгөн райондорунан бери өспүрүмдөр келишип, мыкты эс алып жатышат.

Анваржан ХАКИМОВ “Жеткинчек Ош” балдар лагерин жыйырма төрт жылдан бери үзгүлтүскүз жетектеп келатат.

– Бул жерде балдардын ар тараптуу эс алуусуна заманбап бардык шарттар жаратылган. Бассейн күнү-түнү кызматта. Маал-маалы менен дискотека жагы уюштуруп турабыз. Мындан тышкары отряддар арасында түрдүү сыныктар өткөрүлүп турат. Иши кылып өспүрүмдөрдү эч качан зериктирбейбиз, – дейт “Жеткинчек Ош” балдар лагеринин директору Анваржан ХАКИМОВ.

– Жакыр жашаган үй-бүлөлөрдүн, согуш жана ооган апаатынын ардагерлеринин балдарына бир катар жеңилдиктер каралган, – деп кепке кошулду Ош облустук өнөр жай, коммуналдык тейлөө жана ишкердүлүк кызматкерлеринин кесиптик кошуунунун төрагасы Абдилүмүт ОМОШЕВ. – Ар агымда балдар он күндөн эс алышат. Жолдомо наркы 4700 сом. Бирок, эмгекчилердин кесиптик уюмунун атайын фонду 4200 сомду көтөрүп, ата-энелер болгону 500 сом гана казынага төлөшөт. Төрт маал ысык тамак ичиребиз. Буерде ар тараптуу эс алууга заманбап гана шарттар жаратылган. Балдардын коопсуздугун ички иштер кызматкерлери үзгүлтүскүз камсыз кылып турушат.

Бексултан ОСЕКОВ, “Жеткинчек Ош” балдар лагеринин 5-отрядынын өкүлү: – Мен Орусиядан келип эс алып жатамын. Анткени, шарты куп жакты. Анан калса лагерь дагы өтө кооз жерде жайланышыптыр. Бул жерден көп досторду дагы таптым. Баары менен мындан ары кат алышып, же телефон аркылуу сүйлөшүп турмакчымын.

Миртилек АЛИШЕР уулу, “Жеткинчек Ош” балдар лагеринин 2-отрядынын өкүлү: – Түрдүү сынактарга үстөккө-босток катышып, ой-чабытыбызды абдан өстүрүп жатабыз. Ар аймактардан чогулганбыз, бирок, ынтымагыбыз абдан күч. Улуу-кичүүгө карабастан, тез эле тил табышып кеттик. Мында тарбиячылардын дагы мээнети абдан чоң.

Арина Сапарбек кызы, “Жеткинчек Ош” балдар лагеринин 1-отрядынын өкүлү: – Бул жердегидей шарт, чындыгында, үйүбүздө деле жок. Лагерь жетекчисинин жана тарбиячылардын камкордугу алкоого гана арзыйт. Буюрса, эмдиги жылы дагы туугандарым менен кошо келейин деп жатам. Негизгиси: жолдомо иттей арзан экен.

– Жайкы каникулда айылдагы үйүмө барбастан, “Жеткинчек Ош” балдар лагеринде моминтип иштеп жатам, – деп кепке кошулду Ош педагогикалык институтунун студенти Мунира БЕРДИБАЙ кызы. – Анткени, буерде мага кадимкидей эле маяна төлөшөт. Ошол эле учурда болочок кесибиме эмитен даярданып, моминтип өспүрүмдөрдү тарбиялоонун сырларын үйрөнүп жатамын.

– Көпчүлүк аймактарда илгерки балдар лагерлери менчиктештирилип, анан талкаланып кетпедиби. Бактыбыз бар экен, Ош облустук өнөр жай, коммуналдык тейлөө жана ишкердүлүк кызматкерлеринин кесиптик кошууну “Жеткинчек Ош” балдар лагерин моминтип сактап калды. Жыл сайын беш агымда 1250 бала жетишээрлик эс алышат, – дейт “Жеткинчек Ош” балдар лагеринин тарбиячысы

Дамира ДАТКАЕВА. – Бул жерде балдар эс алуу менен гана чектелбестен, аң-сезимин өстүрүрүүгө дагы ыңгайлуу шарттар жаратылган.

Алишер ТОКСОНБАЕВ, өз кабарчы