1,570 Бардыгы /

ОшМУнун Өзгөн шаарындагы медициналык коллежине “Эл аралык” деген макам ыйгарылды. Мунун негизги себебин аталган окуу жайдын директору, Кыргызстандын медициналык коллеждер бирикмесинин төрагасы, медицина илимдеринин кандидаты, доцент Өзгөнбай СТАНБАЕВдин өзүнөн сураштырдык.

– Өзгөнбай мырза, ОшМУнун Өзгөн шаарындагы медициналык коллежине “Эл аралык” деген макам бекеринен ыроолонбосо керек?

– Албетте. Муну үчүн ОшМУнун ректораты жана ОшМУнун Өзгөн шаарындагы медициналык коллежинин эмгек жамааты акыркы жылдарда абдан катуу аракеттендик. Эми биздин бүтүрүүчүлөрүбүз Кыргызстандын эле эмес дүйнө жүзүнүн бардык булуң-бурчунда иштегенге ыңгайлуу шарттар жаратылды. Анткени, биздин диплом бардык жерде жарактуу.

– Ошого жараша контракт акысы деле кыйла эле көтөрүлгөндүр?

– ОшМУнун Өзгөн шаарындагы Эл аралык медициналык коллежинде контракт акысы 29-30 миң сом. Албетте, аймактардын жана рыноктун шартында бул жеңилдетилген гана төлөм. Студенттер мынча каражатты мүмкүнчүлүктөрүнө жараша бөлүп-бөлүп эсептешсе деле болот.

– Ошентсе деле талапкерлерди студенттикке иргөөдө адатка айланган жана каныбызга биротоло сиңип калган жемкорлук, паракорлук жана тааныш-билишчилик дагыле тыйылчудай эмес?

– Алишер, мен мындай күмөн саналоорго таптакыр кошулбаймын! ОшМУнун Өзгөн Эл аралык медицина коллежине деле он-лайн режиминде студенттерди окууга кабыл алуу тартиби киргизилди. Мындан тышкары он-лайн режими кышкы жана жайкы сессияларды дагы тапшырууда байма-бай колдонулуп жатат. Дал ушунун өзү адам факторун (студент жана окутуучунун түз байланышын) дээрлик жок кылды. Демек, жанагыл жосунсуз жоруктар жалпысынан тыйылды десем эч жаңылышпаймын!

 – Айтмакчы,  ОшМУнун Өзгөн Эл аралык медицина коллежин бүтүргөндөрдү жумуш менен камсыз кылуу дагыле башыңыздарды оорутуп жатса керек?

–  Жо-жок! Жыл сайын биздин коллежди жүз чакты адис аяктайт. Өзгөн, Кара-Кулжа райондук, Оштогу облустар аралык ооруканалары, бир катар ФПАтар менен ийиндеше тыгыз иштешип жатабыз. Ошондуктан, бүтүрүүчүлөрдүн бардыгына тең жумуш табылат.

Ал эми мобул Эл аралык макам ыйгарылгандан бери биздин окуу жайыбызды бүтүргөндөр каалаган жагына жана өлкөсүнө барып иштөөгө чоң мүмкүнчүлүк гана түзүлүп олтурат.

– Өзгөнбай мырза, Сиз Кыргызстандагы медициналык коллеждердин Биримдигинин дагы төрагасы эмессизби. Андыктан, өлкөбүздөгү медициналык орто окуу жайларынын санын кескин түрдө кыскартууга дегеле позицияңыз кандай?

– Өлкөбүздө биздин эсебибизде 28 медициналык коллеж бар экен. Кичинекей Кыргызстан үчүн бул, албетте, оголе көп. Ошондуктан,Кыргызстандагы медициналык коллеждердин Биримдиги сандан сапатка өтүүнү Кыргыз Өкмөтүнө өзүбүз сунуш этип, дал ушул тапта ушунун үстүндө абдан күрдөөлдүү иштеп жатабыз. Буга ылайык медициналык коллеждерге мамлекеттик лицензия берүү тартибин дагы татаалдаштырдык жана абдан күчөттүк.

Мындан тышкары жалпы республикалык тестирлөөнүн (ЖРТнын) өтүү босогосун 110 баллдан дагы ылдыйлатууну Билим берүү жана илим министрлигине үстөккө-босток демилгелеп жатабыз. Анткени, мындай кадам жемкорлукка биротоло чекит коет. Анан дагы студенттер аймагына карабастан каалаган медициналык коллежинде билим алуусуна ыңгай гана жаратат.

Кепке тарткан: Алишер ТОКСОНБАЕВ, өз кабарчы