828 Бардыгы /

Түркмөнстандын куралдуу күчтөрүнүн катарында кызмат өтөө учурунда ажал тапкан жоокердин үй-бүлөсүнө бийлик азык-түлүктөн бираз жардам берди.

“Азаттыктын” түркмөн кызматынын кабарчысы билдиргендей, маркум Сулейман Оразовдун үй-бүлөсүнө кыркылык өткөрүү үчүн бир кой, 50 килограмм күрүч, бир кап алма, 20 литр суу май беришкен. Жардамды маркум кызмат өтөгөн Серхетабаддагы №2108 аскер бөлүгү көрсөткөн.

19 жаштагы Сулейман Оразов июль айында мерт болгон. Күч түзүм жетекчилиги анын ууланып өлгөнүн кабарлаган.

Түркмөн бийлиги өлгөн жоокердин үй-бүлөсүнө 20 миң манат өлчөмүндө жардам берүүнү убада кылган, бирок бере элек.

Түркмөнстан мыйзамдарына ылайык, аскер кызматкери өз милдетин аткаруу учурунда ажал тапса, үй-бүлөсүнө өлгөн адамдын бир жылдык маянасынан он эсе жогору өлчөмдө бир жолку жардам көрсөтүлүшү керек.

​ Жоокердин туугандары анын ууланып өлгөнүнө ишенишпейт. Түркмөнстан Коргоо министрлиги жана ИИМ өкүлдөрү сөөктү алып келгенде эмне үчүн анын ичеги-карды жана мээси алынганын, денесиндеги тиликтер кайдан пайда болгонун түшүндүрүп беришкен эмес. Ошондуктан жоокердин туугандары ага ок тийген болушу ыктымал деп эсептешет.

№2108 аскер бөлүгү Ооганстан менен чек арада жайгашкан. Бир нече жылдан бери “Азаттыктын” түркмөн кызматынын өз булактары ал жактагы атышуулар жана түркмөн чек арачыларынын өлүмү тууралуу кабарлап келишет.

www.