610 Бардыгы /

НАРЫН. Нарын шаарынын тургундарынын 97 пайызы таза суу менен камсыз этилди. Мындан тышкары 40 пайызы канализация системасын пайдалануу мүмкүнчүлүгүнө ээ  болушту.

Бул туурасында Кыргыз Республикасынын Президенти Сооронбай Жээнбековду Нарын шаарын таза суу менен камсыздоо жана канализация системасын калыбына келтирүү боюнча долбоорду ишке ашыруунун жүрүшү менен тааныштыруу учурунда айтылды.
Кыргыз Республикасынын Өкмөтүнө караштуу Суу ресурстары мамлекеттик агенттигинин директору Көкүмбек  Таштаналиев жана Суу ресурстары мамлекеттик агенттигине караштуу Ичүүчү суу менен камсыздоону жана суу бөлүштүрүүнү өнүктүрүү Департаментинин директору Аскарбек Токтошев Европа реконструкциялоо жана өнүктүрүү банкынын (ЕРӨБ) колдоосу менен ишке ашырылып жаткан долбоор Нарын шаарынын ичүүчү суу менен камсыздоо системасын модернизациялоого жана агып чыкма сууларды башкарууну өркүндөтүүгө багытталгандыгын гана билдиришти. Бул максаттарга ЕРӨБ тарабынан жалпысынан 6,2 миллион евро каралган. Бул долбоордун алкагындагы курулуш иштери 2018-жылдын июнь айында башталган жана 2019-жылдын аягына чейин аяктоо болжолдонууда. Алар Нарын облусунун ичүүчү суу менен камсыздоо системасын модернизациялоо боюнча башка долбоорлор Швейцария Конфедерациясынын колдоосу менен ишке ашырылып жатканын кошумчалашты.
Мамлекет башчысы Сооронбай Жээнбеков өлкө калкынын турмушуна тикелей тиешеси бар ушул сыяктуу социалдык долбоорлорду ишке ашырууга көмөк көрсөтүп жатышкан өнүктүрүү боюнча эл аралык өнөктөштөрө терең ыраазычылыгын билдирди. Ал ошондой эле Аймактардын жашоочуларын таза суу менен камсыздоо маселеси анын өзгөчө жеке көзөмөлүндө тургандыгын жана президенттик ишмердигинин эң башкы артыкчылыктарынын бири экендигин дагы эске салды.
Андан соң Президент Сооронбай Жээнбеков ошондой эле Нарын шаарынын суу чарба башкармалыгынын жаңы имаратын көрүп чыкты.

Алишер ТОКСОНБАЕВ, өз кабарчы