1,719 Бардыгы /

Ата-энеси эмгек мигранты болуп иштеп кеткен жаш наристелердин ур-токмоктон ооруканага түшкөндүгү, айрымдары каза болгондугу тууралуу сенсациаялуу фактылар массалык маалымат каражаттары аркылуу элге жетип, чуу жаратып келет. Жаш балдар көбүнчө алыскы-жакынкы туугандарынын колунда калып, алардан зомбулук көрүшүүдө. Эл аралык коргоосуна көмөктөшүү борбору көмүскөдө билинбей туугандарынан кордук көрүп жүргөн балдар көп болушу мүмкүндүгүн аныктап, аны жоюуга көмөктөшүү максатында жер-жерлерде айыл тургундары менен жолугушууларды уюштуруп жатышат. Кезектеги жыйын Базар-Коргон айыл өкмөтүндө өткөн.

-Интернет сайттарга чыгып, ооруканада комага түшүп каза тапкан 2 жашар наристелерди баарыбыз эле билсек керек. Ал коомчулукка билинип калганы гана. Сузакта эжесинин колунда калган кызга ата-энеси смартфон алып берсин деп акча жөнөтсө, өзүнүн кызына алып берип коюптур, анысы аз келгенсип эжеси да, кызы да урат экен. Байкуш кыз анан мектептеги директоруна качып барып, арызданган. Ал го эми сүйлөй алат, акылы кирип калган экен дейли. Тили чыга элек, мектеп жашына жете элек жаш балдарчы? Алар чүнчүп жүрө бериши керекпи? Андай болбойт, ата-энелер жоопкерчиликти сезип, Россияга кетээрде социалдык кызматтарга кабар берип, баласы бирөөнүн колунда калып жатканын билдирип койсо, мамлекет да тең жоопкерчилик тартат. Социалдык кызматкерлер алардын эмне ичип-жеп, кантип жашап жатканын көзөмөлдөп турушат, – дейт Эл аралык коргоосуна көмөктөшүү борборунун  адиси Акылбек Ташбулатов.

Базар-Коргон районунун өзүндө эле 3 миң 800дөн ашуун мигрант ата-энелердин балдары бар. Алар социалдык өнүгүү башкармалыгында катталгандар гана. Аны адистер үймө-үй кыдырып жүрүп аныктаганбыз деп билдиришти. Эгерде ата-энелер сыртка чыгып кетип жатканын жана бала чоң-ата, чоң-энесинин же туугандарынын колунда калгандыгын мектепке билдирип коюшса, же ишеним кат жазып калтырышса, ал балдар жергиликтүу бийликтин тиешелүү адистери тарабынан көзөмөлдө болот.

Роза Акматжан кызы “Аймак”