Аймак

ТАЖИКСТАН: ПРОКУРАТУРА ЖАШТАРДЫ КҮЧ МЕНЕН АСКЕРГЕ АЛЫП КЕТҮҮ ФАКТЫСЫ БОЮНЧА ТЕКШЕРҮҮ БАШТАДЫ

ТАЖИКСТАН: ПРОКУРАТУРА ЖАШТАРДЫ КҮЧ МЕНЕН АСКЕРГЕ АЛЫП КЕТҮҮ ФАКТЫСЫ БОЮНЧА ТЕКШЕРҮҮ БАШТАДЫ

 650 Бардыгы /

Душанбенин аскердик прокуратурасы уландарды күчтөп армияга алып кетүү тууралуу жарандардын даттануулары боюнча текшерүү иштерин баштады.

Буга «Тажикстан» гезитинде иштеген үч студенттин аскердик комиссариатка күч менен жеткирилгендиги тууралуу социалдык түйүндөгү билдирүүлөрү себеп болгон.

Алардын айтымында, 23-октябрда бирөөсүн сабакка баратканда, экөөсүн репортаж даярдап жүргөндө кармап кетишкен.

— Алгач мени милиция бөлүмүнө алып барышты. Студент экенимди айтсам ишенбей коюшту. Көрсөтмө алгандан кийин кылмышкерлердей кылып колумду артка кайрып, Сино райондук комиссариатына алып барышты. Ал жакта күч менен алып келинген 20дай бала бар экен, көбү студент экенин айтышты. Аларды сүрөткө тартып, редакцияга жөнөтүүгө жетиштим, — деди студенттердин бири.

Анын айтымында, берки эки курдашы уландарды күчтөп аскерге алып кетүү учурлары тууралуу репортаж даярдап жүргөн маалда кармалышкан. Үчөө тең аскердик комиссариатка жеткирилгенден бир нече сааттан кийин кайра кое берилген.

Душанбе аскердик прокуратурасынын өкүлү Косим Баротзода текшерүү иштеринин алкагында ар бир жабырлануучу маектешүүгө чакырыларын билдирди:

— Аскердик комиссариаттын же укук коргоо органдарынын кызматкерлери тарабынан кандай мыйзам бузуулар болгонун аныктоо үчүн биз ар бир жабырлануучу менен сүйлөшөбүз. Мындай бир дагы учур текшерүүсүз калбайт, — деди ал.

Мыйзамга ылайык, Тажикстанда 18-27 жаштагы эркектер эки жыл аскердик кызмат өтөөгө милдеттүү. Армиядан студенттер, оорулуулар, үй-бүлөдөгү жалгыз балдар жана кеминде эки балалуу жарандар бошотулат.

www.

Автор

Байланыш дареги

Email: aymak.kg@mail.ru

Телефон: +996 (770) 81-00-32

Факс: +996 (3722) 2-32-36

Адрес: Жалал-Абад ш. Ленин к. 17