1,204 Бардыгы /

ЖАЛАЛ-АБАД. Бүгүн 19-декабрда Мамлекеттик жаза аткаруу кызматынын (ЖАМК) кызматкерлери үчүн курулган 70 батирлүү үй өкмөт башчы Мухаммедкалый Абылгазиевдин катышуусунда пайдаланууга берилди.

Анда өкмөт башчы соттук реформанын алкагында орган кызматкерлеринин социалдык абалын жакшыртуу үчүн бир топ аракеттер жүрүп жатканын белгиледи.

«Өлкөбүздө чоң бир өзгөрүүлөр болуп жатат. Анын катарында ЖАМКнын системасында да чоң өзгөрүүлөр орун алууда. Бишкекте 5 үй курулуп, анын экөөсү (81 батир) пайдаланууга берилди. Сокулукта да кызматкерлер үчүн 24 батир курулуп жатат. Өкмөт кызматкерлердин абалын жакшыртуу үчүн колдон келген аракетин жумшап жатат. Бул мамлекеттин саясаты. Мамлекеттик жаза аткаруу кызматынын кызматкерлерине айта кетерим, мамлекет сиздердин эмгегиңиздерди баалайт. Ошондой эле шаарлардын борборунда жайгашып калган жаза аткаруу жайларын да сыртка чыгаруу боюнча пландар бар. Бул Жалал-Абад шаарына да тиешелүү», – дейт М.Абылгазиев.

Бүгүнкү күндө Жалал-Абад областы боюнча ЖАМКнын кызматкерлеринин 90%ы турак-жай менен камсыз болушту. Ал эми үй алуу боюнча кезекте эми гана иш баштаган жаш 9 кызматкер бар.

Белгилей кетсек, Жалал-Абад шаарынын Курманбек көчөсүндө тагыраагы Жалал-Абад аэропортуна жакын жерде Мамлекеттик жаза аткаруу кызматкерлери үчүн курулган 5 кабаттуу үй 70 батирден турат. Ага мамлекеттин бюджетинен жалпы 108 миллион 884 миң сом жумшалган. Курулуш 2017-жылдын май айында башталып, 25-ноябрда толугу менен бүткөрүлгөн. Бирок үй Жарандык авиация департаменти тарабынан Аба кодексинин талаптарына жооп бербей турганы айтылып, уруксат берилбей келген болчу.  Ал эми буга чейин 60тан ашык кызматкер 7-10 миң сомго чейин төлөп, батирлерде жашашчу.

Бүбүсара ОРОЗАЛИЕВА, “Аймак”