1,257 Бардыгы /

Жаңы жыл жакындап, пиротехникалык каражаттарды кооптуу жайларда колдонуудан улам өрт чыгып кетүү коркунучу күч алды. Майрамдык иш-чараларга карата даярдыктарды көрүүдө жана өткөрүүдө өрт кырсыктарын алдын алуу максатында Жалал-Абад шаары боюнча өзгөчө кырдаалдар бөлүмү шаар аймагындагы майрамдык иш-чаралар өтүүчү мектептерде, балдар бакчаларында, маданият үйлөрүндө өрткө каршы түшүндүрүү иш-чараларын күчөттү.

Урматтуу шаар тургундары жана меймандары! Эгерде сиз пиротехника каражаттарын колдонууну пландаштырып жатсаңыз, анда маанилүү маалыматты эстеп калыңыз:

Пиротехникалык буюмду тандоо:

– Колдон жасалган пиротехникалык буюмдарды пайдаланбаңыз!

– Пиротехникалык буюмдарды сатып алып жатып, кунт коюңуз, шайкештик сертификатынын, мамлекеттик тилдеги нускаманын бардыгын, жарактуулук мөөнөтүн текшериңиз.

– Бардык пиротехникалык буюмдар менен иштөөгө киришип жатып, өтө кунт коюу менен алардын колдонуу нускамалары менен таанышыңыз жана көрсөтүлгөн коопсуздук аймактарына өзгөчө көңүл буруңуз.

Пиротехника менен иштөөдөгү коопсуздуктун негизги чаралары:

– Фейерверк үчүн орунду тандаңыз, эң мыкты жер болуп бул үчүн ачык, кенен аянт – короо, сквер же курулуштары жана бак дарагы болбогон ачык жер эсептелинет.

– Тандалган жерди дыкаттык менен карап чыгыңыз, жакын жерде (100 метр тегеректе) өрт коркунучу бар обьектилер, автомобилдердин токтоп туруучу жайы, жыгач сарайлар жана башка өрт кооптуу курулуштар болбошу керек.

Эгерде Сиздин короо чакан жана тар болсо, анда сиз чектелген ассортимент менен, негизинен жерге жакын аракет кылган петардалар, тарс этмелер сыяктуу пиротехникалык буюмдар менен пайдалансаңыз болот, бирок эч качан жогору учкан буюмдар – ракеталар, көпөлөктөр жана башкалар пайдаланылбашы керек.

Аларды турак үйлөрдүн жана башка курулуштардын жанында пайдаланууга таптакыр тыюу салынат: алар терезеге кирип кетиши мүмкүн, курулуштардын чатырына түшүп, өрттүн себепкери болушу мүмкүн. Үйдөн алысыраак кетип, ылайыктуураак жерди табууга аракет кылыңыз.

Таптакыр тыюу салынат:

– Салюттарды колдон учурууга (тарс этмелерден, бенгал отторунан, фонтандардын айрым түрлөрүнөн тышкары) жана алар иштеген 2 мүнөт ичинде жакындоого.

– Аларды пайдалануу учурунда анын үстүнө эңкейүүгө.

– Нускамада жана ушул коопсуздук чараларында каралбаган башка бардык аракеттерди жасоого, ошондой эле даяр буюмдарды ачууга жана кайра өзгөртүүгө.

– Пиротехниканы жабык жайларда, квартираларда, офистерде колдонууга (жабык жайларда колдонууга руксат берилген тарс этмелерден, бенгал отторунан жана фонтандардан башка).

– Балдарга өз алдынча пиротехникалык буюмдарды аракетке келтирүүгө.

– Суу болгон пиротехникалык буюмдарды жылыткыч приборлордо кургатууга.

Эгерде күйгүзүлгөн петарда атылбаса, аны ачпагыла! Аны үңүлүп карабагыла, кулакка тыңшабагыла – так ошол учурда ал жарылып кетиши мүмкүн.

Жалал-Абад шаары боюнча өзгөчө кырдаалдар бөлүмү Сиздерге коопсуз майрам каалайт!

Жалал-Абад шаары боюнча өзгөчө кырдаалдар бөлүмүнүн Өрт өчүрүү жана алдын алуу бөлүмчөсүнүнү улук офицери, капитан Камчыбеков Эмильбек