Аймак

ПРЕЗИДЕНТ 2020-ЖЫЛГА КАРАТА ӨЛКӨНҮН АРТЫКЧЫЛЫКТУУ БАГЫТТАРЫ МЕНЕН ТААНЫШТЫ

ПРЕЗИДЕНТ 2020-ЖЫЛГА КАРАТА ӨЛКӨНҮН АРТЫКЧЫЛЫКТУУ БАГЫТТАРЫ МЕНЕН ТААНЫШТЫ

 1,088 Бардыгы /

БИШКЕК. Президент Сооронбай Жээнбеков Маалыматтык технологиялар жана байланыш мамлекеттик комитетинин (МТБМК) төрагасы, өзүнүн кеңешчиси Дастан Догоевди кабыл алды.

Мамлекет башчысы 2019-жылы өлкөнү санариптик трансформациялоо, мамлекеттик жана муниципалдык кызматтарды көрсөтүүнүн сапатын ого бетер жогорулатуу жана аларды электрондук форматка толук өткөрүү жаатындагы масштабдуу иштер жасалгандыгын зор канааттануу менен белгиледи. Маалымат алмашууну автоматташтыруу процесси бизнес жана мамлекеттик органдарда экономиканын бардык чөйрөлөрүндө башталгандыгы белгиленди. Бир катар архивдик документтер санариптик форматка өткөрүлүп, кайталанган функциялары менен справкалар дээрлик жоюлду. Санариптик платформа түзүлүп, ал жеке түзүмдөрдүн «Түндүк» Электрондук өз ара аракеттенүү утумуна активдүү кошулуусун камсыздады. Президент Сооронбай Жээнбеков санариптик технологияны экономикага жана социалдык тармакка терең киргизүү максатында калктын, мамлекеттик жана муниципалдык кызматкерлердин санариптик көндүмдөрүн мындан дагы жакшыртуу зарылдыгын баса белгиледи.

-Санариптик инфратүзүмдү калыптандыруу, тиешелүү платформаларды жана маалымат базаларды түзүү менен катар өлкө  жарандарын санариптик көндүмдөргө үйрөтүп, буга катышкан мамлекеттик органдардагы кызматкерлердин компетенттүүлүгүн дагы жогорулатуу абзел!  Ошондой эле тездетилген санариптик трансформациясы үчүн жагымдуу мыйзамдык негизди түзүүбүз зарыл! Мунсуз калк санариптешүүнүн реалдуу оң натыйжаларын сезе албайт!  — деп баса белгиледи Сооронбай Жээнбеков жана өлкөнүн санариптик трансформациясы 2020-жылы дагы мамлекеттик саясаттын артыкчылыктуу багыты болуп кала берээрин дагы бир ирет эске салды.

Мындан тышкары Президент маалымат алмашууну коргоону камсыз кылуунун маанисин өзгөчө белгилеп, кибер коопсуздукту камсыздоо жана электрондук коммерцияны өнүктүрүү маселелерине дагы өзгөчө көңүл бурду. Маалыматтык технологиялар жана байланыш мамлекеттик комитетинин төрагасы, Президенттин кеңешчиси Дастан Догоев 2019-2023-жылдарга карата «Санариптик Кыргызстан» Концепциясынын алкагында өлкөнү санариптик трансформациялоо боюнча үстүбүздөгү жылга карата артыкчылыктуу багыттары туурасында кеңири маалымат берди. Быйыл Кыргыз Республикасынын Президентинин 2020-жылды — Аймактарды өнүктүрүү, өлкөнү санариптештирүүжана балдарды колдоо жылы деп жарыялоо боюнча Жарлыгына ылайык, билим берүү, саламаттыкты сактоо, айыл чарбасы жана калкты социалдык жактан коргоо тармактарын санариптештирүүгө артыкчылыктуу тартипте басым жасалаарын убадалады. Жер-жерлердеги муниципалдык кызматтарды электрондук форматка өткөрүү максатында «Санарип аймак» платформасын киргизүү боюнча иштер ого бетер күчөтүлөт.  Бул жергиликтүү өз алдынча башкаруу органдарына «Түндүк» системасына кошулуу аркылуу башка мамлекеттик органдар менен маалымат алмашуусуна мүмкүндүк жаратат.

Бул иш Маалымат технологиялары жана байланыш Мамлекеттик комитетинин жөнгө салуусу алдында Улуттук статистикалык комитет, Мамлекеттик каттоо кызматы жана Жергиликтүү өз алдынча башкаруу жана этникалар аралык мамилелер боюнча Мамлекеттик комитети менен биргеликте жүргүзүлөт. Жарандардын, мамлекеттик жана муниципалдык органдардын кызматкерлеринин санариптик сабатын жогорулатуу максатында маалыматтык-агартуу иштерине мындан ары өзгөчө көңүл бурулат.Маалымат технологиялары жана байланыш мамлекеттик комитетинин төрагасы Дастан Догоев 2020-жылы аталган платформаны өлкөнүөн бардык региондоруна киргизүү пландалып жаткандыгын дагы кошумчалады.

Алишер ТОКСОНБАЕВ, өз кабарчы

Автор

Байланыш дареги

Email: aymak.kg@mail.ru

Телефон: +996 (770) 81-00-32

Факс: +996 (3722) 2-32-36

Адрес: Жалал-Абад ш. Ленин к. 17