732 Бардыгы /

Дүйшөмбү күнү Орусиянын президенти Владимир Путин Конституцияны өзгөртүү тууралуу мыйзам долбоорун Мамлекеттик Думанын кароосуна жөнөттү. Бул тууралуу президенттин басма сөз катчысы Дмитрий Песков билдирди.

Мамлекеттик Думанын сайтына жарыяланган документте Баш мыйзамдын 22 беренесине өзгөртүүлөрдү киргизүү сунушталган.

Ага ылайык, Конституцияга Мамлекеттик кеңеш деген жаңы бийлик органы киргизилет. Ал «мамлекеттик бийлик органдарынын эриш-аркак иштешин камсыздоо, ички жана тышкы саясаттын негизги багыттарын, мамлекеттин социалдык-экономикалык өнүгүүсүнүн приоритеттүү багыттарын аныктоо максатында» президент тарабынан түзүлөт.

– Мамлекеттик Дума президент сунуштаган өкмөт башчысын, ошондой эле премьер-министр сунуштаган вице-премьер менен министрлерди бекитүү укугун алат. Күч түзүм башчыларын президент Федерация Кеңеши менен макулдашкандан кийин өзү бекитет. Ошол эле маалда өлкө башчы премьер-министрди жана министрлерди кызматтан алуу укугун сактап калат.

– Мыйзам долбоорунда Конституциядагы президенттик мөөнөттүн саны тууралуу беренеден «катары менен» деген сөздү алып салуу сунушталган: «Бир эле адам Орусия Федерациясынын президенти кызматын эки мөөнөттөн ашык ээлей албайт» деп жазылган анда. Демек, Путин 2024-жылы мөөнөтү аяктагандан кийин президенттик кызматка кайтып келе албайт.

– Мамлекеттик Думанын депутаттары, Федерация Кеңешинин мүчөлөрү (алар үчүн «сенатор» термини киргизилет), министрлер жана соттор үчүн жаңы чектөөлөр киргизилет. Алар Орусиянын сыртында туруктуу жашоо укугун бере турган башка өлкөнүн жараны, жашап туруу укугу сыяктуу документтерге ээ болбошу керек.

– Өзгөртүүлөргө ылайык, Орусиянын президенти болуп өлкөдө кеминде 25 жыл жашаган жана буга чейин башка өлкөнүн жараны болбогон адам шайлана алат. Ошол эле маалда бул чектөө мурда Орусиянын курамына кирбеген өлкөнүн же анын бир бөлүгүнүн жарандарына тиешелүү болбой тургандыгы жазылган.

– Мындан тышкары эл аралык келишимдерге караганда Орусиянын негизги мыйзамдарына артыкчылык берүүгө тыюу салуу сунушталууда.

– Мыйзам долбоорунда өзгөртүүлөр парламент тарабынан кабыл алынгандан кийин «жалпы элдик добуш берүүгө» чыгарыла турганы жазылган. Азырынча добуш берүү качан жана кандай болору белгисиз.

Путин Конституцияга өзгөртүүлөрдү киргизүү планы тууралуу 15-январда билдирген. РБКнын маалыматына караганда, жалпы элдик добуш берүү 12-апрелде өткөрүлүшү мүмкүн.

www.