1,586 Бардыгы /

Ош облусуна караштуу Өзгөн шаарындагы бүт мектептер интернет түйүнүнө туташтырылып, дэрлик санариптештерилди. Мындай жагдай агартуу мекемелериндеги жемкорлукка аеосуз акыры бөгөт коюп, алардын үстүнөн коомчулуктун көзөмөлүн ого бетер күчөттү. Бул жөнүндө Өзгөн шаардык билим берүү бөлүмүнүн башчысы Нурилло ШАМАМАТОВ кабарчыбызга курган маегинде ачык эле моюндады.

– Нурилло агай, Аймактарды өнүктүрүү, санариптештирүү жана балдарды колдоо жылында негизинен кайсыл өңүткө өзгөчө басым жасап жатасыздар?

– Адегенде бардык мектептерибизди интернет түйүндөрүнө тегиз коштурдук. Балдар бакчаларына дагы кудум ушундай ыкма толук түрдө киргизилди. Электрондук каттоо, электрондук журнал жана электрондук күндөлүк дээрлик баары тең санариптештирилди. Мындай жөрөлгө,биринчиден, ар өңүттөгү жемкорлукка биротоло бөгөт койду. Экинчиден,ата-энелердин көзөмөлүн ыраса күчөттү. үчүнчүдөн, агартуу мекемелерине темирдей тартипти орнотту. Албетте, мындан баарыбыз эле уттук.

– Соңку мезгилде маянанын аздыгынан улам алыскы аймактардагы мектептерге жаш адистер таптакыр эле барбай калышпадыбы. Мындай көйгөйдөн Өзгөн шаары деле кур эместир?

– Ошентсе да, акыркы мезгилде мугалимдердин айлык акысы дээрлик отуз пайызга жогорулабадыбы. Ошондуктан, элетке агылган жаш агартуучулар абдан арбыды. Демек, жаңы күчтөр катарыбызды улам толуктап жатышат. Ошентсе дагы, орус тили, физика жана химия сабактары боюнча үч орун дагыле бопбош турат. Бул маселени аргасыздан ЖОЖдордун Өзгөн шаарындагы филиалдары аркылуу чечүүнү максаттап жатабыз.

Мындан тышкары калаабызда мугалимдерди турак жай менен камсыз этүү дагы дагыле кендирибизди кесип келатат. Анткени, көптөгөн жылдардан бери Өзгөн шаарында көп кабаттуу үйлөр курулбай калбадыбы. Анан дагы жер тилкесин ажыратуу аймакта дегеле мүмкүн эмес! Президентибиз Сооронбай Жээнбековдун Аймактарды өнүктүрүү саясатына ылайык калаабызда көп кабаттуу үйлөр курулуп калса, бул баш оорутмадан дагы сөзүсз арылып калаттырбыз. Буга улай Өзгөн шаарынын мэриясына мугалимдерди коммуналдык төлөмдөрдөн бошотуу, же жеңилдетүү өтүнүчү менен расмий түрдө кайрылдык эле. Калаа башчысы бул сунушубузду Шаардык Кеңешке абдан катуу табыштады. Буюрса, жергиликтүү депутаттар бизди колдойт деп абдан катуу үмүттөнүп турабыз.

– Нурилло агай, жалпы республикалык тестирлөө аймактардагы билим сапатын кашкайта ашкерелеп жатпайбы. Бул жаатта Сиздердин көрсөткүчтөр деги чеке жылытчудайбы?

– Ооба. 2018-2019-окуу жылында 357 бүтүрүүчүбүздүн 181и ЖРТ тапшырышты эле. Булардын сегизи ЖОЖдордогу бюджеттик тайпаларга, ал эми алтымыш экиси ЖОЖдордун контракттык тайпаларына шыр эле өтүп кетишти. Мактангандык эмес, бирок, башка аймактарга салыштырганда бул абдан эле мыкты көрсөткүч!

Маалымат иретинде: Өзгөн шаарында жети орто мектеп, жалгыз мектеп-гимназия, алты мектепке чейинки жана үч мектептен тышкаркы билим берүү мекемелери бар. Буларда окутуу кыргыз, өзбек жана орус тилдеринде жүргүзүлөт.  14 370 жаш муунга 520 мугалим сабак берип келатат.

Алишер ТОКСОНБАЕВ, өз кабарчы, Өзгөн шаары