12,663 Бардыгы /

Күн өткөн сайын жашообузда миң түркүн өзгөрүүлөр болуп жатат. Кээде биз мурда укпаган, көрбөгөн, турмушта кездешпеген нерселер да жолугат. Башкасын кой, кадимки эле биз пайдаланып жүргөн дары-дармектерди алалы. Учурда дарылардын түрү көбөйүп кетти. Бирок ошого жараша оорулардын да түрү көбөйүп, саны өсүүдө. Ал оорулардын айрымдарынын аталыштары көпчүлүк журт түшүнбөгөн тилде болуп, эсибизди оодарган учурлар көп.

Мисалы, жүрөк оору менен ооруган адамдардын саны күн санап көбөйүүдө. Бул боюнча адистешкен дарыгерлердин айтымында жүрөк оорунун башкы себептеринин бири – бул ашыкча салмактуулук. Ашкере семиздиктин натыйжасында адам кант диабети менен да ооруп калуусу толук ыктымал. Статистикалык маалыматтар боюнча кант диабети менен дүйнө жүзүндө ар бир 7-секундда бирден киши жарык дүйнө менен коштошот.
Тилекке каршы, Кыргызстанда да жүрөк оорусу менен ооруган адамдардын саны көбөйүүдө. Мисалы, Сузак районундагы жүрөк кан-тамыр ооруканасына өткөн жылы эле 870 адам кайрылып, анын ичинен 58 адам инфарктка чалдыгып, 16 адам каза тапкан. Ал эми ушул жылдын 6 айында 26 адам инфаркт болуп, ооруканага түшкөн. Бул өткөн жылга салыштырмалуу бир кыйла көп.
Негизинен инфаркт катуу стресстен пайда болот экен. Стресс кайсы маалда пайда болот? Ал бир нерсеге катуу кыжаалат болгондо, көп ойлонгондо болот. Анан дагы себептеринин бири ашыкча салмак сактоо.
Инфаркттын азабын 7 жылдан бери тартып келе жаткан Эргаш Тешебаев төмөндөгүлөрдү айтып берди.
-Мен 2007-жылдан бери ушул оорунун айынан кыйналып келем. Кудайга шүгүр, учурда абалым жакшы. Ар бир 6 айда дарыланып турам. Бирок менин салмагым ашыкча деле эмес болчу. Демек стерсстен оорудум окшойт. Врачтар жакшы карагандыктан учурда абалым жакшы,- дейт бейтап.

– Бул оору көбүнчө катуу стресс болуудан, ашыкча салмак сактоодон, алкоголь ичимдиктерин көп колдонуудан келип чыгат,- дейт аталган оорукананын бөлүм башчысы Махпира Самиева.
Анын айтымында инфаркт менен эркек кишилерге караганда аялдар аз ооруйт. Анан дагы 45-50 жаштан жогорку аялдарда гана оору катталат. “Бул ооруга чалдыккандардын арасында жаштар да бар, бирок, азыраак. Өкүнүчтүүсү жүрөгү ооруган жаштардын саны жыл сайын арбып баратат”, – дейт М. Самиева.

Санрабия САТЫБАЛДИЕВА, “Аймак”