Аймак

ӨЛКӨДӨ «ЭМГЕК БИРЖАЛАРЫНДА» КҮНҮМДҮК ИШ ИЗДЕГЕНДЕР КӨБӨЙДҮ

ӨЛКӨДӨ «ЭМГЕК БИРЖАЛАРЫНДА» КҮНҮМДҮК ИШ ИЗДЕГЕНДЕР КӨБӨЙДҮ

 2,622 Бардыгы /

Кыргызстанда расмий маалыматтар боюнча жумушсуздуктун деңгээли 2020-жылы 4% жогорулаган. Буга биринчи кезекте коронавирус пандемиясы жана көптөгөн бизнестердин жабылышы себеп болгон.

Эпидемияга чейин туруктуу иши болгон кишилер эми көбүнчө күнүмдүк жумуш издеп «эмгек биржаларына» барууга аргасыз болууда.

Бишкектин тургуну Эрнис да жумушсуз. 37 жаштагы киши кышында эжесиникинде жашап, жайкысын чыгып кетет. Акча табуу үчүн ал күн сайын шаардын бир нече түйүнүндө калыптанган «эмгек биржаларына» келет. Жол бойлой турган кишилер кээде ремонт жасап, кээде жүк түшүрүп, ар түрдүү иштерди аткарышат. Эрнис биржага эртең менен саат тогузда эле келген, бирок бүгүн аны эч ким жалдаган жок.

«Кээде иш бар, кээде жок. Эгер иш берүүчү начар болсо акчаны дурус төлөп бербейт. Эгер жакшы жумуш таап калсаң, бир күнгө 1000 сом төлөшөт. Сүйлөшкөнүңө жараша, кээде андан деле көп болуп калат», – деди Эрнис.

Бишкекте Эрнис сыяктуу кишилер жүздөп саналат. Алардын көбү ишти Лев Толстой көчөсүндөгү жана Ош базарында жайгашкан көпүрөдөгү биржадан издешет. Көбү камерага сүйлөп берүүдөн тартынышат.

Бишкекте күнүмдүк жалданып иштеген жумушчулар 500 сомдон жогору табышат, негизинен акы сүйлөшүүгө жараша болот. Быйыл пандемияга байланыштуу «эмгек биржаларында» кишилердин саны көбөйдү. Мурда Орусия жана башка өлкөлөрдө иштеген мигранттар чектөөлөргө байланыштуу чет мамлекеттерге чыгып кете албай калышты.

«Үйдө аялым жана үч балам бар. Эгер иш таппасам, алар үчүн нан да, картошка да болбойт. Картошка 30 сом, эт 450 сом. Чынын айтсам, төрт айдан бери эт жей элекмин. Орусиядан 2019-жылы келгем, кайра кетейин деп жатам, бирок ал үчүн 650 доллар керек. Минтип көпүрөнүн жанында жүрөбүз, күнүнө 500 сом тапсак сүйүнөбүз, эгер 1000 сом болсо андан бетер жакшы», – деди жалданма жумушчулардын бири.

Расмий маалыматтарга караганда, өлкөдө дээрлик 100 миңдей киши жумушсуз жүрөт. Бирок көз карандысыз экономисттер ишсиздердин саны алда канча көп деп эсептешет.

WWW

Автор

Байланыш дареги

Email: aymak.kg@mail.ru

Телефон: +996 (770) 81-00-32

Факс: +996 (3722) 2-32-36

Адрес: Жалал-Абад ш. Ленин к. 17