1,551 Бардыгы /

2021-жылдын 4 айында Жалал-Абад облусунун аймагында 116 өрт кырсыгы катталып,  өрттөн 9 млн. 994 миң 488 сомдук материалдык зыян келтирилген. Өрттөн 5 автоунаа, 92 тонна тоют, 13 мал жандыктары жабыркаган. Өткөн жылга салыштырмалуу өрт кырсыгынын саны 31,8%, ал эми, келтирилген зыяны 2,7 эсеге өскөн.

Негизинен өрт кырсыктарынын көпчүлүгү (89 өрт) турак жайларда катталып, алардын кесепетинен адамдар каза (7 адам) болушууда.

Алсак, 2021-жылдын 2-январы күнү Жалал-Абад шаарынын Шевченко көчөсү № 36 дарегиндеги турак үйдө өрт кырсыгы катталып, Өрт өчүрүү учурунда өрт чыккан турак үйдөн 2 жарандын (1 аял, 1 эркек) жансыз денеси табылган.

2021-жылдын 20-марты күнү Базар-Коргон районунун Сейдикум айыл аймагынын Сейдикум айылынын тургуну Кадыров Таиржан аттуу жаран электр жылыткычына  денесинин болжолдуу 70% күйүп, Ош шаарындагы ооруканада каза болгон.

2021-жылдын 30-апрели күнү Сузак районунун Таш-Булак айыл аймагынын Жаңы-Арал айылындагы М.Калбаев көчөсү-74 дарегинде өрт чыгып, өрт өчүрүү учурунда куткаруучулар тарабынан өрттөнүп жаткан турак үйдүн экинчи кабатынан 4 адамдын, анын ичинде 1 аял киши, 3 жаш баланын жансыз денелери табылган.

Урматтуу жарандар!

            Жогорудагыдай өрттөрдү алдын алуу үчүн өрт коопсуздук эрежелерин  сактайлы:

–  жаш балдарды, кары-картаңдарды кароосуз калтырбагыла;

–  жаш балдарга от менен ойноого жол бербегиле;

–  күйүп жаткан ширенкени жана тамеки калдыгын туш келди таштабагыла;

– тиричилик электр жабдыктарын, газ плиталарын жандырылган абалда көзөмөлсүз калтырбагыла;

–  электр жылытуу  приборлорун күйүүчү предметтерге жакын  орнотпогула;

–   курулмаларга жакын от жакпаңыздар, өрткө кооптуу жайларда таштандыларды өрттөбөгүлө;

–  жашаган бөлмөлөрдү ачык от менен жылытпагыла;

–   күйүүчү материалдарды чатырларда, жер төлөлөрдө, тепкичтерде сактабагыла;

– үйдө эч ким жок мезгилде жана түнкүсүн газ приборлорун (плита, суу ысытуучу колонка) жандырылган абалда калтырбагыла.

– өрткө кооптуу заттар жана суюктуктар менен иштөөдө коопсуздукту сактагыла.

– жаш балдарга өз алдынча газ жана электр приборлорун колдонуусуна жол бербегиле.

Урматтуу жарандар! Өрт коопсуздук эрежелерин сактоо менен силер жакындарыңарды жана турак жайыңарды өрттөн сактап кала аласыңар.

Өрт же өзгөчө кырдаал катталса 101, 112 номерлерине чалыңыздар!

КР ӨКМнин Жалал-Абад облусу боюнча башкармалыгынын башчысы полковник Абдулнасир Закиров

WWW.