3,179 Бардыгы /

Сөзү:  А.Исаевдики
Обону: С.Жумалиевдики
Көрүшкөнчө көздөрүңдөн чагылган,
Нурларына курган кайран көпүрөм.
Бекемине күмөн санап жаңылгам,
Өтүмү жок болгонума өкүнөм.

Кимге айтып күйүтүмдү,
Кимге барып өтүнөм.
Кимге айтып күйүтүмдү,
Кимге барып күнү-түнү,
Кимге барып өтүнөм?

Таңшыгыча табышмактуу таң сыры,
Тандап кеттиң таңы салкын өлкөнү.
Табалбайм карыганда айт чыныңды,
Артык бекен башка жердин көркөмү?

Арбалсаң да бир келерсиң,
Ала-Тоону көргөнү.
Арбалсаң да бир келесиң,
Ала-Тоону бир көргөнү.

Кала бердим мекенимде сени эстеп,
Жүрсө экен деп алыс жерде эсен-соо.
Өкүнөрүм көкүрөгүм элестеп,
Көргөн сайын жылан бүрккөн жанар тоо.

Жалын бүрккөн үшкүрүгүм,
Жаңырыгы жанар тоо.
Жалын бүрккөн үшкүрүгүм,
Жаңырыгы жанар тоо.