1,430 Бардыгы /

Шамалды-Сай шаарчасынын калкы өнүгүүнү каалашат!- мындай пикирлерин Шамалды-Сайлыктар өткөн аптанын соңунда КРнын депутаты, “Өнүгүү-Прогресс”саясий партиясынын лидери Бакыт Төрөбаев менен жолугушуусунда айтышты.

КР ЖКнын депутаты, “”Өнүгүү-Прогресс” саясий партиясынын лидери Бакыт Төрөбаев Таш-Көмүр шаарынын жана Шамалды-Сай шаарчасынын жашоочулары менен жолугушту. Алгач эл өкүлү Шамалды-Сай аймактык ооруканасынын абалы менен таанышып, көйгөйлүү маселелерин укту. Анда маалым болгондой бул оорукана Ош-Бишкек жолуна жакын болгондуктан жол кырсыгынан жабыркагандар көп кайрылышат. Тез жардам көрсөтүүгө керектүү шаймандар менен камсыздоо адам өмүрүн сактап калуу менен барабар экендигин айткан Бакыт Төрөбаев абалды чечүү үчүн саламаттык сактоо министрлигине маселе коёрун билдирди. Андан сырткары аталган оорукананын терапия бөлүмүнүн бир палатасы партиянын саламаттык сактоо тармагын өнүктүрүү багытынын алкагында заманбап жабдуулар менен камсыздалган. Керектүү жабдуулар менен ыңгайлуу шарт түзүлгөн бөлмөдө дарыланып жатышкан энелер партиянын бул колдоосу бейтаптарга сакайып кетүүсүнө өбөлгө түзөөрүн айтышты.
Андан кийин эл өкүлү “Өнүгүү-Прогресс” саясий партиясынын курулуш тармагын өнүктүрүү программасынын алкагында Шамалды-Сай шаарчасынын Заречная, Аксы, Спортивная жана Ленин көчөлөрүнө шагыл төгүлүп, жолдорду калыбына келтирүү иш-чарасынын сапаты менен таанышып чыкты.Жалпысынан төрт көчөнүн бир жарым чакырым аралыктагы бөлүктөрү оңдолгон. Буга чейин жаз, күз айларында көчөдө басуу мүмкүн болбой калган. Анткени жаан-чачында балдар окууга барууда баткактан кыйналып келишкен. Ошондой эле Кыргызстан көчөсүнүн 12 чакырым аралыгына кечки шам чырактар коюлган. Бул аракеттерди колго алып карапайым калктын тартып келген азабынан куткарган партия өкүлдөрүнө ыраазчылык билдирем жана Шамалдысайлыктар шаардын гүлдөшү менен бирге өнүгүүнү каалашат – дейт жолдоруна шагыл төшөлүп берилген көчөнүн жашоочусу Улук Ирсалиева.
Ал эми жалпы жыйындын жүрүшүндө сөз алган партия лидери Бакыт Төрөбаев Кыргыз мамлекети ар тараптуу өнүгүүгө мүмкүнчүлүктөр бар экендигин жана ага жалпыбыз салым кошуубуз керек экендигин баса белгилдеди. Ар бир жасалган жумуштун натыйжасын, сапатын жана жемишин текшерүүнү колго алганда гана өлкө өнүгүүгө карай жол алат деди-эл өкүлү.
Жолугушууда Бакыт Төрөбаев партиянын спортту өнүктүрүү багытында Шамалды-Сай шаарчасындагы жаштардын спорт борборуна жаңы заманбап үлгүдөгү спорт жабдууларын тапшырды. “Өнүгүү-Прогресс” саясий партиясынын лидери жаштарды ар кандай кылмыштуулуктардын алдын алууга спортту колдоо жана жаштарды бул багытка тартуу жакшы натыйыжа берээрин белгиледи. Жаштардын атынан чыгып сүйлөгөн Замирбек Калбаев эл өкүлүнө ыраазычылыгын айтып, жаштардын келечеги үчүн мындай колдоо өз жемишин берээрин айтат.

Тынычбек Мамаев