1,681 Бардыгы /

ОШ. Өзгөчө кырдаал режими киргизилген Ноокат, Кара-Суу райондорунда жана Ош шаарында коомдук тартипти көбүнчө жаштар бузуп жатышат. Мындан ары дал ушундай ээн баштарга аёосуз жана катаал чаралар көрүлөт. Бул туурасында Ош аймагынын коменданты, милициянын полковниги Малик Нурдинов ачыктады.

-Малик мырза, жашырып не, Ошто коменданттык режим тартибин бузгандар күн сайын көбөйүп баратпайбы. Буларга неге мыйзам чегинде катаал чара көрбөй жатасыздар?

-Алгачкы күндөрдө жарандар арасында түшүндүрүү жараянын катуу жүргүздүк. Эми мындан ары көчөлөрдө бей-жай жүргөндөрдү жана жеке автоунааларын себепсиз эле айдагандарды эч аябайбыз! Аларды сөзсүз тособуз. Анан олчойгон жазага дагы кириптер кылабыз.

-Ошентсе деле түшүндүрүү маалында Сиздерге кыр көрсөтүп, өзгөчө абал тартибине баш ийишпегендерди кантесиздер?

-Азыркы шартта укук коргоо органдарынын өкүлдөрүнөн жана медицина кызматкерлеринен куралган ыкчам топ түзгөнбүз. Булар күнү-түнү иштеп жатышат. Тартип бузуп кармалган жарандарды мажбурлап текшерүүгө жаткырабыз. Мунун чыгымын бут өздөрү чөнтөгүнөн төлөшөт. Анан буларга дагы 300-400 миң сом өлчөмүндө айып пул салынат. А түгүл Кылмыш-Жаза Кодексине ылайык 17 жылга дейре түрмөгө кесилишет.

-Малик мырза, мындайда дагы эле тааныш-билишчилик, анан акча балакети чоң роль ойноп кетчү эле?

-Биз бүгүнкү жагдайда андай акмакчылыкка дегеле азгырылбайбыз! Ыкчам топтон дал ушуну гана талап кылып жатамын. Күнөөкөр сөзсүз мыйзам чегинде жазаланууга тийиш! Ошондо гана мындай катаал чара башкаларга ачуу сабак болот жана кайталанбайт.

Кепке тарткан: Алишер ТОКСОНБАЕВ, өз кабарчы