1,245 Бардыгы /

Августтун башында АКШ Конгрессинин Өкүлдөр палатасынын спикери Нэнси Пелоси Тайбэйге барып кеткенден бери алгачкы жолу америкалык эки кеме Тайван кысыгы аркылуу өттү. Бул тууралуу Reuters агенттиги жазды.

АКШнын өкүлдөрү кемелер жакынкы өлкөлөрдүн жээктерине жакын барбастан, эл аралык зона аркылуу өткөнүн билдиришти. Вашингтон кемелердин Тайван кысыгынан өтүшү – “АКШнын Инди-Тынч океан аймагындагы ачыктык принцибине умтулганын көрсөтөрүн” белгиледи.

Тайвандын Коргоо министрлиги кемелер түштүк тарапка кеткенин жана алардын куралдуу күчтөрү транспорттук кыймыл эч бир окуясыз өтүп кетүүсүн күзөтүп турушканын кабарлады.

Кытай армиясынын өкүлдөрү алардын аскерлери жогорку күжүрмөн даярдыкка келтирилгенин жана кандай гана чагым болбосун алдын алууга даяр экенин жарыялады.

Мурдараак АКШнын Аскер-деңиз күчтөрүнүн кемелери Кытайдын нааразылыгына карабай Тайван кысыгы аркылуу тынымсыз өтүп турчу. Бээжин америкалык кемелер Кытайдын чек арасын бузуп жатат деп эсептейт.

АКШ Тайван менен расмий дипломатиялык мамиле түзгөн эмес, бирок аралдын өзүн-өзү коргоосуна түрдүү багытта каражат берип турууга даяр.

Кытай аралды өзүнүн аймагы деп эсептейт жана аны өз көзөмөлүнө алуу үчүн күч колдонуу ыктымалдыгын да жокко чыгарбайт.

WWW.