1,113 Бардыгы /

14-сентябрда Кытайдын лидери Си Цзиньпин мамлекеттик сапар менен Нур-Султан шаарына барат. Бул тууралуу Казакстандын Тышкы иштер министрлигинин (ТИМ) басма сөз катчысы Айбек Смадияров билдирди.

“Сапардын алкагында мамлекет башчылардын ортосунда эки тараптуу сүйлөшүүлөр болуп, кызматташтыктын түрдүү тармактары боюнча документтерге кол коюлат деп күтүлүүдө”, – деди Смадияров.

Анын айтымында, бул 2020-жылы коронавирус пандемиясы башталгандан берки Кытай лидеринин алгачкы чет өлкөлүк сапары болот.

Си Цзиньпиндин Казакстанга барары быйыл июнда казак президенти Касым-Жомарт Токаев менен Кытайдын тышкы иштер министри Ван И Нур-Султанда жолукканда белгилүү болгон.

Казак бийлиги өлкөнүн негизги инвесторлорунун жана насыя берүүчүлөрүнүн бири эсептелген Бээжинге карата сын айтуудан карманып келет. Нур-Султан Шинжаңдын жергиликтүү жашоочулары, анын ичинде казактар куугунтукталып жатканын расмий түрдө айыптаган эмес. Казак аткаминерлери Шинжаңда болуп жаткан окуялар Кытайдын ички иши экенин айтышкан.

Жакындары Кытайда калган жарандардын тобу дээрлик бир жарым жылдан бери Кытайдын Алматыдагы консулдугунун алдына чыгып, Шинжаңдагы туугандарын бошотууну талап кылып, Нур-Султанды бул маселеге кийлигишүүгө чакырып келишет. Бирок көпчүлүк учурларда мындай акциялар күч менен таратылып же полициянын катышуучулардын жолун тороп, консулдук имаратына жакын жолотпой коюшу менен аяктап келет.

Си Цзиьпин Казакстандан ары Шанхай кызматташтык уюмунун (ШКУ) саммитине катышуу үчүн Өзбекстанга барары кабарланды. 15-16-сентябрь күндөрү Самаркандда өтө турган саммиттин жүрүшүндө Кытайдын лидери Орусия Украинага кол салгандан бери алгачкы жолу орус президенти Владимир Путин менен жолугат деп күтүлүүдө. Кытай Украинадагы согушта нейтралдуу позицияда экенин билдирип, бирок БУУдагы добуш берүүлөрдө Орусияны колдоп келет.

WWW.