1,242 Бардыгы /

          ЖАЛАЛ-АБАД. Жалал-Абад облусунун Ала-Бука районундагы Иштамберди алтын кениндеги Full Gold Mining компаниясынын шахтасындагы  кырсыкты иликтөө максатында мекемелер аралык комиссия түзүлдү. Бул жөнүндө Кыргыз Өкмөтүнүн басма сөз кызматынан кабарлашты. Анткени, алтын казган шахтада эки киши газга ууланып каза табышкан.

Буга дейре Министрлер кабинетинин төрагасынын орун басары Бакыт Төрөбаев Экологиялык жана техникалык коопсуздук кызматына Иштамберди алтын кениндегишахтада газга уулануунун себептерин дыкаат талдап чыгууну тапшырган. Жаратылыш ресурстары, экология жана техникалык көзөмөл министрлигине обьектидеги коопсуздук техникасынын сакталышы жана аны камсыз кылуу боюнча көзөмөлдү күчөтүүнү дагы табыштаган. Мындан тышкары Өкмөт башчысынын орун басары каза тапкандардын жакындарына дагы көңүл айтып, Жалал-Абад облусунун Чаткал районундагы шахтадагы өзгөчө кырдаалдын кесепеттерин жоюу иштери анын жеке көзөмөлүндө тургандыгын кошумчалаган. Ал эми Full Gold Mining компаниясы каза тапкандардын жана жабыркагандардын үй-бүлөсүнө тийиштүү жардамды көрсөтөөрүн катуу убадалаган.

Айтмакчы, Ала-Букадагы алтын кениндеги кырсык ушул жылдын 11-октябрында түн ичинде жүз берген. Маалыматка караганда, 37 жана 24 жаштагы эки адам иске ууланып каза тапкан. Ал эми жалпысынан 10 киши ууланып, ооруканага кайрылган. Алар бүт үйлөрүнө чыгарылгандыгын жана ал-акыбалы канааттандырарлык экендигин аймактык оорукананын жетекчисинин орун басары Өмүралы Жээнтаев шардана кылды. Ууланган адамдардын баары тең – Ала-Бука жана Чаткал райондорунун тургундары. Ушул тапта милиция бул бөөдө кырсыктын чоо-жайын терең териштирүүдө.