1,251 Бардыгы /

Дүйшөмбү күнү эртең менен Батыш Казакстан облусундагы Аксай шаарына жакын жайгашкан Карачаганак мунай кенинде KKS-Sicim компаниясынын жүздөгөн жумушчусу айлык акыны 50% жогорулатууну талап кылып, ишке чыгуудан баш тартышты.

Аты-жөнүн айткысы келбеген жумушчулардын бири ишкана имаратынын алдындагы нааразылык акциясына “миңге жакын киши” катышып жатканын билдирди. Анын айтымында, жумушчулар айлыкты көтөрүү маселесин былтыр да көтөрүп чыгышкан. Бирок анда жетекчилик эмгек акыга 10% кошуу менен гана чектелген.

“Жумушчулар адистигине жараша 180 миңден 250 миң теңгеге чейин (400-550 доллар) айлык алышат. Бүт баары кымбаттап жатканда бул эч нерсеге жетпейт”, – деди ал.

Жумушчулардын айтымында, күндүн биринчи жарымында аларга компания жетекчилиги менен облустук эмгек инспекциясынын өкүлдөрү, Аксай шаарынын прокурору жана шаар башчысынын орун басары жолугуп, 1-февралдан тарта айлыктарына 20% кошуларын убадалашты. Бирок чогулгандар бул сунушка макул болбой, маянаны январь айынан баштап 50% жогорулатууну талап кылышты.

KKS-Sicim — италиялык SICIM жана казакстандык “КазКомСервис” компанияларынын биргелешкен ишканасы жана Карачаганат долбоорун ишке ашыруу үчүн бириккен компаниялардын Karachaganak Petroleum Operating B.V. (KPO) консорциумунун подрядчиги болуп эсептелет. KKS-Sicim магистралдык мунай жана газ куурларын төшөө менен алектенет.

WWW.