672 Бардыгы /

ОШ. Транспорт жана коммуникациялар министрлигинде иштегендердин мамлекетке акчалай зыян келген ишке катыштыгы бар экендиги айтылууда. Анткени, Ош — Баткен — Исфана жолун оңдоп-түзөө маалында 189 миллион сом кымырылгандыгы акыры аныкталды.

Башкы прокуратуранын мааплыматына караганда, 2017-2021-жылдары аталган автоунаа жолунун 75-108-чакырымдарын реконструкциялоо долбоору боюнча подрядчы компанияга 20 миллион 136 миң 220 доллар которулган. Тилекке каршы, аталган министрликтин жооптуу кызматкерлери подрядчы компания 189 миллион 200 миң 223 сомдук жумушту аткарбагандыгына карабастан, атайын банктык кепилдикти узартпай туруп жумуш аткаруу актыларын негизсиз кабыл алышкан. Ошондой эле жолду мыйзамсыз эксплуатацияга киргизишип, мамлекетке 189 миллион сомдон ашык зыян дагы келтиришкен.

Текшерүүнүн жыйынтыгына ылайык Башкы прокуратура тарабынан Кылмыш-Жаза Кодексинин 337- («Кызмат абалын кыянаттык менен пайдалануу»), 245- («Коммерциялык, же башка уюмдардын кызматчыларынын ыйгарым укуктарын кыянаттык менен пайдалануу») жана 346-беренелеринин («Кызматтык жасалмачылык») негизинде кылмыш иши козголуп, ушул тапта тергөө амалы абдан кызуу жүргүзүлүүдө.

          Алишер ТОКСОНБАЕВ, өз кабарчы