882 Бардыгы /

БИШКЕК. Кыргыз Республикасынын ИИМдин Кылмыш иликтөө башкы башкармалыгынын Ысык-Көл жана Нарын облустары боюнча Уюшкан кылмыштуулук менен күрөшүү бөлүмүнүн ыкчам кызматкерлери өз өлкөсүндө оор кылмыш жасагандыгы үчүн издөөдө жүргөн Казакстандын жаранын кармашты.
ИИМдин басма сөз кызматы билдиргендей, жакында Бишкек шаарынын аймагындагы ыкчам иш-чаралардын жүрүшүндө жеке менчик мейманканалардын биринен коңшу мамлекеттин жараны 1992-жылы туулган А.Б. кармалган. Ал Казакстандын укук коргоо органдары тарабынан Казакстан Республикасынын Кылмыш-жаза кодексинин 99-беренеси “Адамдардын тобу тарабынан жасалган адам өлтүрүү” боюнча издөөдө жүргөн.
Алынган маалыматка караганда, жогоруда аталган жаран оор кылмышты жасагандыгы үчүн кылмыш жоопкерчилигинен качуу максатында Кыргыз Республикасынын чек арасынан мыйзамсыз өтүп, Бишкек шаарынын аймагына жашырынып жүргөн.
Кыргыз Республикасынын ИИМдин Кылмыш иликтөө башкы башкармалыгына казакстандык кесиптештери тергөө органдарынан жашырынып жүргөн адамды издөөгө жана кармоого көмөк көрсөтүү боюнча өтүнүч менен кайрылышкан.
Кылмышка түздөн-түз тиешеси бар 1992-жылы туулган жаран Кыргызстандын аймагында жашынып жүрүшү мүмкүн деген маалымат келип түшкөн. Кармалган жаран А.Б. белгилүү клубдун жыйырма сегиз жаштагы фитнес-машыктыруучусун
өлтүрүүгө шектелүүдө. Ал 17-июлга караган түнү Алматы шаарында аны атып өлтүргөн. Андан соң Наурызбай райондук ички иштер бөлүмү 31 жаштагы жаранга издөө салып, Алматы шаарынын адистештирилген райондор аралык тергөө соту ага карата сыртынан камакка алууга чечим чыгарган. Маалым болгондой, ал буга
чейин оор кылмыш жасагандыгы үчүн жоопко тартылган.
Кыргыз Республикасынын ИИМдин Кылмыш иликтөө башкы башкармалыгынын кызматкерлери жогорудагы жаранды тез эле кармашкан.
Учурда Казакстандын жараны камакка алынды.