840 Бардыгы /

Ульяновск облусунун Димитровград шаарындагы түрмөнүн кызматкерлери камактагы мусулмандардын сакал-мурутун күч менен кырып, диний жана этникалык өңүттө кемсинтип, сабап, намаз окууга тоскоолдук жаратууда.

Бул тууралуу “Гражданское содействие” комитети түрмөдө отурган беш кишинин баянына таянуу менен билдирди.

“Июль айынын башында соттолгон мусулмандарды мончого алып барышты. Ал жерде сакалдын узундугун 9 мм, чачтын узундугун 20 мм ашпагандай кылып кыркабыз. Абактын кызматкерлери устаралардын башын сындырып, чачыбыз менен сакалыбызды эрежеге ылайык алууну талап кылышты. Укугум бузулгандыктан баш тарттым. Абак кызматкери “бул жерде мыйзам менмин” деп жооп берди”, – деген камактагылардын бири.

Өзбекстандык дагы бир жаран кызматкерлер ур-токмокко алышып, диний негизде кемсинтип, жасабаган кылмыштары үчүн жоопко тартабыз деп коркутушканын айтты. Ургандан кийин анын денеси көгөргөн, бирок дарыгер муну каттаган эмес:

“Колонияда азан айтылса, алар атайын музыка коюп, бизге тоскоолдук жаратышат. Куран аяттары, дубалар жазылган кол жазмаларды, жайнамаздарды алып коюшат. Түрмө кызматкерлери бизди негизсиз кемсинтип, террорист, экстремист, канкор деп атап, улуттук негизде мазакташат. Жооп катары биз кайрылуу жазып эле эмес, ачкачылык жарыялоого да аргасыз болдук”.

Анын айтымында, мекеменин кызматкерлери мусулмандардын тамак-ашына чочконун этин кошуп, тамактан баш тартууга мажбурлашууда.

Абактагылар ошондой эле адам чыдагыс шарттарга, антисанитардык абалга нааразы болушкан.

“Гражданское содействие” комитети менен иштешкен адвокат соттолгондор менен маектешип, прокуратурага арыз жолдоду.

WWW.