1,071 Бардыгы /

ОШ. Өзгөчө кырдаалдар министрлиги Ош шаары менен Ош облусундагы бардык билим берүү мекемелериндеги өрт коопсуздугун тыкыр текшерип жаткан чагы. Дал ушул күнгө карата 45 жайда өрттүн болтурбоо, алдын алуу жана өрт өчүрүү чаралары, эрежелер сакталган эмес деп табылды. Ошондуктан, саналган мүчүлүштүктөрдү чукул арада жоюуга мөөнөт дагы берилди.

          Өзгөчө кырдаалдар министрлигининӨрткө каршы көзөмөлдөө кызматы Ош шаарынын билим берүү мекемелерине дагы бир ай бою көзөмөл жүргүзөт. Бүгүнкү күнгө карата шаар менен облуста 45 билим берүү мекемеси өрт коопсуздугунун эрежелерин таптакыр сактабагандыгы аныкталды. Мектептерге, ошондой эле бала бакчаларга суу жеңчелерин, түтүктөрүн, өрт өчүрүүчү каражаттарды калыбына келтирүүгө жана башка кемчиликтерди жоюуга дагы убакыт берилди. Ошондой эле мугалимдерге, тарбиячыларга жана окуучуларга өрт кырсыгын алдын алуу, болтурбоо үчүн түшүндүрүү жараяны күчөтүлдү.

          Өткөн айда Ош облусуна караштуу Кара-Кулжа районундагы Кайың-Талаа айылындагы мектеп өрттөнүп кеткен. Анын себеби тууралуу маалымат берилген эмес. Ал эми былтыр өрттөн өлкөбүздө 30 адамдын өмүрү кыйылган. Жалпысынан 3194 өрт кырсыгы катталып, материалдык чыгым 3 миллиард сомдон ашкан. 31 адам куткарылып, 52 миллиард сомдук мүлк сакталып калган.

Алишер ТОКСОНБАЕВ, өз кабарчы