2,575 Бардыгы /

Орусиянын Борбордук шайлоо комиссиясы (БШК) Владимир Путинди президенттикке талапкер катары каттоого алды.

Конституцияга киргизилген өзгөртүүлөргө ылайык, Путин бешинчи (жана алтынчы) жолу президент болууга укуктуу. Ал Орусияны 2000-жылдан бери башкарып келет.

Путин шайлоого өзүн-өзү көрсөткөн талапкер катары катышат. Каттоодон өтүү үчүн ал орусиялыктардын кеминде үч жүз миң колун чогултушу керек болчу.

Кол топтоодо көптөгөн мыйзам бузуулар орун алды. Тактап айтканда, Санкт-Петербургда тилкелик комиссиянын мүчөлөрү кол топтогон, буга мыйзам түздөн-түз тыюу салат. Жергиликтүү бийлик өкүлдөрү Путинге кол топтоо жөнүндө маалымат берип, ошол эле учурда аны мактап-жактап, “талапкердин оң имиджин түзүү” менен алектеништи. Чиновниктерге жана депутаттарга үгүт иштерин жүргүзүүгө тыюу салынат.

Путинди талапкер катары каттоого албоо талабы менен БШКга арыз түшкөн. Арызда кол топтоодо мыйзам бузуулар болгону, Конституцияга мыйзамсыз өзгөртүү киргизилгени жазылган. Ага Орусиянын мурдагы жана азыркы 26 депутаты кол койгон.

Путинге чейин “Новые люди” партиясынан Владислав Даванков, Орусия Федерациясынын Коммунисттик партиясынан Николай Харитонов жана Либерал-демократиялык партиясынан Леонид Слуцкий талапкер болуп катталган. Алардын партиялары Мамлекеттик Думада болгондуктан, кол топтоо талап кылынбайт. Жалпысынан президенттикке 11 талапкер ат салышууда, кол топтоо 31-январда аяктайт.

Орусияда президенттик шайлоо 2024-жылдын 15-мартынан 17-мартына чейин өтөт. Көз карандысыз байкоочулар бийлик шайлоо жараянына такай кийлигишип, оппозицияга бут тосуп, бийликчил талапкерлерге артыкчылыктарды түзүп, айрым учурларда түздөн-түз добуштардын жыйынтыгын бурмалоого жол берерин белгилеп келишет.

WWW.