1,158 Бардыгы /

          Баткен, Жалал-Абад жана Чүй облустарынын аймагында бир катар батир уурулуктарын тынымсыз жасап жүрүшкөн кылмыштуу топтун мүчөлөрү акыры кармалышты. Бул туурасында Ички иштер министрлигинин басма сөз кызматынан билдиришти.

          Маалыматка караганда, аталган топ төрт кишиден куралган. Булар быйыл 30-январда Жалал-Абад облусундагы Ноокен районунун Кочкор-Ата шаарында жайланышкан үйгө секин киришип, алтын зер буюмдарын, ноутбук жана акча каражатын уурдап, келтирилген чыгым жалпы суммасы 211 миң сомду түзгөн. Ал эми 28-январда ушул эле топ Чүй облусундагы Аламүдүн районунун Лебединовка айылындагы Өскон-Ордо жаңы конушунда жайгашкан үйгө дагы киришип, алтын зер буюмдарын уурдап кетишкен.  Жапа чегишкендер милицияга арыз менен кайрылышып, Кылмыш-Жаза Кодексинин 205-беренеси «Уурулук» боюнча кылмыш иши козголгон.

          Баса, шектүүлөр дайыма автоунаа менен жүрүшүп, алдын ала сүйлөшүп, чогуу-чараан аракеттенишип, көбүнчө зер буюмдарды жана акча каражаттарды гана уурдаганга кыныгышкан. Кармалган адамдардын өздүгү акыры аныкталып, алар мурда бир нече жолу соттолгон, 1979-жылы туулган А.Ж., 1988-жылы туулган М.А., 1992-жылы туулган М.О. жана 1996-жылы туулган Ю.Ш. экендиги такталып, убактылуу кармоочу жайга дароо камалышты. Ал эми шектүүлөрдү тинткенде, жандарынан уурдалган алтын зер буюмдар, акча каражаттары, телефондор жана дагы үй буюмдары табылып олтурат.

          Ушул тапта бул кылмыштуу топтун Баткен, Жалал-Абад жана Чүй облустарынын аймагында жасалган уурулук фактылары аныкталды. Тергөө кызуу улантылууда.

          Алишер  ТОКСОНБАЕВ, өз кабарчы