621 Бардыгы /

ОШ. Ош областынын прокуратурасы тарабынан соттук актыларынын аткарылышына текшерүү жүргүзүлүп, жыйынтыгы менен Ош шаардык сотунун жооптуу кызматкерлери кызмат абалдарын кыянаттык менен пайдаланышып, башка адамдар үчүн пайда көрүү жана артыкчылык алуу максатында сот актысы күчүнө кирген учурдан тартып үч жылдын ичинде аткаруу барактарын САКБга жиберген эмес.

КРдин Башкы прокуратурасынын маалымат кызматы билдиргендей,жыйынтыгы менен 8 автоунаа мамлекеттин пайдасына өндүрүлбөгөн. Ошону менен чектелип калышпастан Ош шаардык сотунун жооптуу кызматкерлери оор жана өзгөчө оор кылмыштар боюнча кыймылсыз мүлктү конфискациялоо жөнүндө аткаруу барактарын атайылап, мыйзамга каршы туура эмес толтурушуп, алардын кызматынын кызыкчылыктарына каршы  болгон мыйзамсыз аракеттеринен улам, 7 жер тилке мамлекеттин пайдасына алынбай, мамлекетке жалпысынан 14 млн 280 миң сом зыян келтирилген.

Аталган факты боюнча Ош областынын прокуратурасы тарабынан Кыргыз Республикасынын КЖКнин 337-беренеси менен (кызмат абалын кыянаттык менен пайдалануу) кылмыш иши козголуп, тергөө амалдарын жүргүзүү үчүн Кыргыз Республикасынын УКМКнын Ош шаары жана Ош областы боюнча Башкы башкармалыгынын ТБнө тапшырылды.