39 Бардыгы /

Кыргыз Республикасынын прокуратура органдарынын ишмердүүлүгүндөгү артыкчылыктуу багыттардын бири — ишкерлик субъекттеринин мыйзамдуу укуктарын жана кызыкчылыктарын коргоо болуп саналат.

КРдин Башкы прокуратурасынын маалымат кызматы маалымдагандай, көзөмөл ишмердүүлүгүнүн алкагында Башкы прокуратура тарабынан Кыргыз Республикасынын Финансы министрлигине караштуу Мамлекеттик салык кызматынын, ошондой эле Бишкек шаарынын жана Чүй областынын аймактык салык органдарынын ишмердүүлүгүндө Кыргыз Республикасынын «Укук бузуулар жөнүндө» кодексинин талаптарынын сакталуусу боюнча мониторинг жүргүзүлгөн.

Натыйжада, салык инспекторлору тарабынан аталган Кодекстин 318-беренесинин 4-бөлүмүнүн талаптары бузулуп, ишкерлик субъекттерине карата мыйзамсыз түрдө 5 000 сомдон 13 000 сомго чейинки өлчөмдө айыптар салынганы аныкталган. Ал эми мыйзам боюнча бул бузуу үчүн жазалоо чарасы катары айып салуу эмес, эскертүү гана каралган.

Текшерүүнүн жыйынтыгы менен Башкы прокуратура тарабынан мыйзамсыз чыгарылган токтомдор жокко чыгарылып, 25 салык кызматкери Кыргыз Республикасынын «Укук бузуулар жөнүндө» кодексинин 435-беренеси боюнча ар бири 10 000 сом өлчөмүндө айып пулга жыгылды.

Бул багыттагы иштер улантылууда.

Башкы прокуратура ыйгарым укуктуу органдар тарабынан ыйгарым укуктардан аша чабуу жана ишкерлердин укуктарын бузуу, анын ичинде негизсиз санкцияларды колдонуу учурлары мыйзам чегинде дароо аныкталып, бөгөт коюлаарын эскертет.