3 Бардыгы /

Кыргыз Республикасынын Президентинин Жалал-Абад облусундагы ыйгарым укуктуу өкүлүнүн аппарат жетекчиси Манас Базылбековдун жетекчилиги алдында ымыркайлардын өлүмүнүн алдын алуу боюнча онлайн форматтагы жыйын өткөрүлдү.

Жыйынга райондук мамлекеттик администрация башчыларынын жана шаарлардын мэрлеринин социалдык маселелер боюнча орун басарлары, жалпы дарыгерлер практикалык борборлорунун жетекчилери, облустук үй-бүлөлүк медицина борборунун өкүлдөрү, ошондой эле эмгек, социалдык камсыздоо жана миграция башкармалыктарынын жетекчилери катышты.

Маалыматка ылайык, 2026-жылдын алгачкы төрт айында айрым район жана шаарларда ымыркайлардын өлүмү өткөн жылдын ушул мезгилине салыштырмалуу өскөн. Тактап айтканда, Базар-Коргон районунда 16 учур катталып, өткөн жылга салыштырмалуу 9 учурга көбөйгөн. Токтогул жана Ала-Бука райондорунда 7ден учур катталып, тиешелүүлүгүнө жараша 2 жана 1 учурга өсүү болгон. Ошондой эле үй шартында катталган ымыркайлардын өлүмү боюнча Манас шаары, Аксы, Базар-Коргон жана Ала-Бука райондорунда көрсөткүчтөр тынчсыздануу жаратып жатканы белгиленди.

Ыйгарым укуктуу өкүлдүн аппарат жетекчиси Манас Базылбеков тарабынан ымыркайлардын өлүмүнүн алдын алуу багытындагы иштерди күчөтүү боюнча бир катар тапшырмалар берилди. Мында, район жана шаарларда атайын жумушчу топтор түзүлүп, ар эки жума сайын жүргүзүлгөн иштерге талдоо жүргүзүү милдеттендирилди. Ошондой эле төрөт үйлөрү, балдар жана жандандыруу бөлүмдөрүндө шарттарды жакшыртуу, толук ысык суу менен камсыздоо, жетишпеген акушер-гинеколог, неонатолог жана балдар реаниматологдорун тартуу боюнча иштерди күчөтүү тапшырылды.

Мындан сырткары, медицина кызматкерлеринин квалификациясын жогорулатуу, кош бойлуу аялдарды эрте мөөнөттөн тартып көзөмөлгө алуу, аз кандуулуктун жана тубаса оорулардын алдын алуу боюнча түшүндүрүү иштерин активдештирүү милдети коюлду.