2,115 Бардыгы /

Жалал-Абад шаарында “Данакер” мүмкүнчүлүгү чектелгендердин коомдук бирикмеси тарабынан уюшулган мүмкүнчүлүгү чектелгендер жана мүмкүнчүлүгү чектелген балдардын ата-энелери жаңы жылдан баштап окутула баштады.

Окуу 3 тармак боюнча башталып, конструктор-бычмачы, кол ѳнѳрчүлүк жана токуу курстарынан турат. Азыркы учурда 10 адам окутулуп, теория менен практиканы айкалыштыра үйрөнүп жатышат.

Аталган окуу курсунда кол өнөрчүлөрдү даярдоодо 4 тигүүчү машина, 1 бычууга жана үтүктөөгө арналган столдор коюлган.

Бул тууралуу “Данакер” мүмкүнчүлүгү чектелгендердин коомдук бирикмесинин төрайымы Айжамал Тарыхчиева өз сөзүндө:

“Былтыркы жылы Жалал-Абадда мүмкүнчүлүгү чектелгендерди колдоо жана коргоо боюнча жыйын өткөргөнбүз. Анда “Чексиз мүмкүнчүлүк” деген иш чаранын негизинде жергиликтүү бийлик менен чогуу, мамлекеттик буйрутмада берилген 30 адамды окутуу программасы бар болчу. Анын алкагында окутууну баштадык”-дейт

Ал жерде окугандардын айтымында бул нерсе жакшы бааланып, мүмкүнчүлүгү чектелгендерди окуу жана жумуш менен гана камсыздабастан, жашоону дагы да улантууга кандайдыр бир деңгээлде стимул жана дем берерин айтып өтүштү.

“Мындай окуулар биз үчүн жакшы болду, себеби биздин дагы элге пайдабызды тийгизип, коом менен аралашууга өбөлгө түзүлдү. Бири-бирибизди көрүп, дагы күчтөнүп, өзүбүздү бутка тургузууга аракет кыла баштайт экенбиз. Бул эми олтуруп жасай турган жумуш, мүмкүнчүлүгүбүз кичине чектелип турат. Азыр деген кайда барба, эмне кылба каражат керек. Өзүбүздү да каржылаганга мүмкүнчүлүк жаралды”-дейт кол өнөрчүлүк курсунда окуп жаткан Чынара Каназарова

Эскерте кетсек, былтыркы жылдын 18-декабрында мүмкүнчүлүгү чектелгендерди коргоо жана колдоо боюнча жыйын болуп өткөн. Анда мүмкүнчүлүгү чектелгендер жана мүмкүнчүлүгү чектелген балдардын ата-энелерин окутуу боюнча маселе каралган.

Акылай КАРАБАЕВА, “Аймак”