1,173 Бардыгы /

Жалал-Абадда коомдук унааларда жүргүнчүлөрдү тейлөө жыл сайын жакшырып баратат. Бул 2018-жылдын жыйынтыктарынан да даана көрүнөт. Бул тууралуу шаар мэриясынын жергиликтүү экономикалык өнүгүү бөлүмүнөн билдиришти.

Бөлүмдүн башчысы Салижан Умаровдун айтымында, жүргүнчү ташуу жагынан шаардагы тейлөө 2017-жылга караганда 2018-жылы 102 пайызга өстү. Мисалы, бир чакырымга ташылган миң жүргүнчүнүн эсебинде 2017-жыл ичи 355 миллион 175,9 миң жүргүнчү ташууга жетишилсе, 2018-жыл ичинде бул көрсөткүч 362 миллион 374 миң жүргүнчүнү түзгөн. Демек, мурдагы жылга салыштырмалуу 7 миллион 198,1 миң жүргүнчү көп ташылган.

Анын ичинен муниципалдык автобаза тарабынан ташылган жүргүнчүлөр саны да 2018-жылы мурдагы 2017-жылга салыштырмалуу 104,2 пайызга өскөн. Башкача айтканда, 2017-жылы автобаза тарабынан бир чакырымга ташылган миң жүргүнчү эсебинде 8 миллион 387,9 миң жүргүнчү ташылган болсо, өткөн 2018-жылы анын саны 8 миллион 740,4 миң жүргүнчүгө жеткен. Демек, мурдагы жылга салыштырмалуу 352,5 миң жүргүнчү көп ташылган.

Эскерте кетсек, шаар мэриясы муниципалдык автобазанын карамагындагы эски автобустарды жаңылоо боюнча атайын инвестициялык долбоор түзгөн. Анткени, автобустар 2010-жылы Кытай Эл Республикасынан келген.

«Аймак»