1,527 Бардыгы /

БИШКЕК. Кыргыз Республикасынын Президенти Сооронбай Жээнбеков Кытай Эл Республикасынын Кыргызстандагы Элчиси Сяо Цинхуаны өлкөдөгү дипломатиялык миссиясынын аяктагандыгына байланыштуу кабыл алды. Мамлекет башчысы Кыргызстан эки тараптуу кызматташууга жана көп тармактуу стратегиялык өнөктөштүккө абдан чоң маани берээрин дагы бир ирет баса белгиледи.

– Биз Си Цзиньпин менен болгон достукту жана эки өлкө элдеринин ортосундагы ынтымакчылыкты абдан жогору баалайбыз! 2019-жыл Кыргыз-Кытай мамилелериндеги абдан маңыздуу жылдардан болот деген үмүтүбүз чоң. Биз бир катар иш-чараларды өткөргөнү жатабыз. Булардын эң эле маанилүүсү: Кытай Эл Республикасынын Төрагасы Си Цзиньпиндин Кыргызстанга мамлекеттик визити жана Кыргыз Республикасынын төрагалыгы астында ШКУга мүчө мамлекеттердин Бишкек шаарындагы Саммити, — деп баса белгиледи Сооронбай Жээнбеков.
            Сооронбай Жээнбеков Кытай Эл Республикасынын Төрагасы Си Цзиньпиндин Кыргызстанга мамлекеттик визити жана ШКУнун Саммити жогорку деңгээлде өтүп, эки жана көп  тараптуу мамилелерге жаңы дем-кубат берээрине ишенгендигин дагы жашырган жок. Ал эми Элчи Сяо Цинхуа Кыргызстанда иштеген жылдары өлкөнү жана анын элин, салт-санаасын абдан жылуу кабыл алгандыгын баса белгилеп, КЭР Төрагасы Си Цзиньпиндин эң жакшы каалоо-тилектерин дагы Кыргыз Президентине билдирди.

– 2018-жылы Сиз КЭРге ийгиликтүү мамлекеттик визит менен барып-келгенсиз. Эки мамлекеттин башчылары өлкөлөрүбүздүн ортосундагы кызматташтыкты оожалтуунун так багытын бердиңиздер. Сиз дайым Кытайга өзгөчө көңүл буруп, колдоо сөзүн айтып келесиз. Кытай келечектүү жана туруктуу өнүгүүнү гана бекем кубаттайт. Ошондой эле ар дайым Кыргызстандын досу жана узак мөөнөттүү өнөктөшү бойдон кала берет!  — деди Кытай Эл Республикасынын Кыргызстандагы Элчиси Сяо Цинхуа.

Соңунда Президент Сооронбай Жээнбеков менен Кытайдын Элчиси Сяо Цинхуа Кыргызстан менен Кытайдын ортосундагы саясий, соода-экономикалык, аймактар аралык, маданий-гуманитардык кызматташтыкты тереңдетүү жана кеңейтүү жаатында дагы олуттуу пикир алышты.

Алишер ТОКСОНБАЕВ, өз кабарчы