1,216 Бардыгы /

БИШКЕК. Президент Сооронбай Жээнбеков Кыргызстандын Транспорт жана Жол министри Жанат Бейшеновду кабыл алып, өткөн жылдын жыйынтыктары, транспорт жана жолдор тармагында аткарылган жумуштар, жол-транспорт комплексинин узак жана кыска мөөнөттүү өнүгүү пландары, мунун ичинде өлкөнү Туруктуу өнүктүрүү стратегиясы жана аймактарды оожалтуунун багыттарына ылайык аткарылган иштер туурасында расмий маалыматын тыңдады.

– БылтырКыргызстандынкичи шаарларында жана айылдарында жалпы узундугу 81,4 чакрым жолго заманбап асфальт төшөлдү. А быйыл Аймактарды өнүктүрүү жана өлкөнү санариптештирүү жылынын алкагында Жол чарба департаменти тарабынан республикабыздын 40 районунда жалпы узундугу 123 чакырым ички жолдорго асфальт төшөө долбоору даярдалып жатат. Ушул тапта  «Кемин» жана «Сосновка» көзөмөл-өткөрүү бекетинде салмак габариттик көзөмөл бекеттери кадимкидей иштеп атат. Булар салмак габариттик көзөмөлдүн автоматташтырылган маалымат системасына толук кошулду. Ошондой эле үч бекет  жакында Ош жана Баткен областарында ачылат. «Электрондук транспорттук көзөмөл» автоматташтырылган системасы ведомство аралык электрондук «Түндүк» системасына кошулду. Бул жүк  ташуучуларга жана жүргүнчүлөрдү ташуучуларга лицензияларды жана транспорт каражаттарына уруксат берүүчү документтерди алуу процедураларын өтө жөнөкөйлөштүрөт. Мындан тышкары «Коопсуз шаар» долбоорунун бир бөлүгү болуп калат. Анткени, бул система ташуучулардын жүк же адам ташууларга (таксиден башка) укугунун (лицензиялар же уруксат кагаздар) бар-жогун аныктоого толук мүмкүндүк берет, – деди Кыргызстандын Транспорт жана Жол министри Жанат Бейшенов.

            Президент Сооронбай Жээнбеков калктын, өзгөчө аймактардагы тургундардын жашоо сапаты, социалдык-экономикалык акыбалы транспорттук байланыштардын өнүгүүсүнөн жана жол инфратүзүмдөрүнүн мыкты иштешинен көз каранды экендигин баса белгиледи.

            – Жол-транспорт инфратүзүмүн, мунун ичинде темир жол жана авиа каттамдарын өнүктүрүү, өлкөнүн транзиттик дараметин мындан дагы жогорулатуу маселелерин чукул арада чечүү зарыл! Мындан тышкары Министрлик өлкөбүздөгү аймактарды туруктуу өнүктүрүү максатында ар бир райондук борбордо жыл сайын үч чакырымдан кем эмес жолдорду салууга тийиш! Буга улай Транспорт жана жолдор министрлигиндеги жемкорлукту жоюу жаатында дагы иштерди мындан ары ого бетер күчөтүү абзел! Ошондой эле инвестициялык долбоорлорду жүзөгө ашырууда эл аралык өнөктөштөр менен ийиндеше иштешүүнү активдештирүү зарыл! – деди Президент Сооронбай Жээнбеков.

            СоңундаПрезидент Сооронбай Жээнбеков Кыргызстандын Аба Кодексиндеги жаңы толуктоолорду эске алуу менен «Бешинчи даражадагы аба эркиндиги» саясатына байланыштуу Жарандык Авиацияны жана ички каттамдарды өнүктүрүү, аба майдандарын мындан ары модернизациялоо, авиа коопсуздугу боюнча ченемдик актыларды заманбап стандарттарга шайкеш келтирүү өңдөнгөн иш-аракеттерди күчөтүү зарылдыгын дагы баса белгиледи.

  Алишер ТОКСОНБАЕВ, өз кабарчы