1,339 Бардыгы /

ЖАЛАЛ-АБАД. 14-февралда Жалал-Абад шаардык кеңешинин кезектеги сессиясы болуп, анда 2019-жылга шаардык бюджетин бекитүү жана 2020-2021-жж бюджетинин болжолу туурасында талкууланды.

Сессияга бардык 31 депутаттын 25и катышып, анын экөөсү чет өлкөдө экени, калгандары ден соолугуна байланыштуу катыша албасы айтылды. Шаардык каржы башкармалыгынын башчысы Азамат Раматиллаев доклад жасап, кийинки жылдын бюджетинин параметрлери тууралуу баяндады. Шаардын быйылкы жылдагы бюджети 474 миллион 675,6 миң сом кирешелери, анын ичинде 79 миллион 67,2 миң сом атайын төлөмдөрдөн түшүүчү кирешелери менен, 474 миллион 675,6 миң сом чыгашалары, анын ичинен 79 миллион 67,2 миң сом атайын төлөм боюнча чыгашалары менен бекитип беришти.

Андан тышкары, 3 миллион сом өлчөмүндө жергиликтүү бюджеттин резервдик фонду түзүлүп, республикалык бюджеттен бөлүнүүчү түрткү берүүчү гранттарды алуу үчүн 12 долбоорго 9 миллион 300 миң сом берилмей болду. Анын баары негизинен билим берүү тармагына жумшалмакчы. Ошондой эле ар бир мекеме-ишкананын жылдык чыгымдары боюнча бюджеттик каражаттар толугу менен бекитилип берилди.

Депутаттар аткаруу бийлигинен бюджеттик каражаттарды үнөмдүү жана сарамжал пайдаланууну талап кылышты. Мисалы катары Ленин көчөсүнө коюлган гүл клумбалары айтылды, анткени ага бюджеттик каражаттан корогон, бирок ылайыксыз делинип, кийин алып салынган.

Депутаттар жер асты өтмөгүн куруудан келип чыккан айрым кемчиликтерге токтолуп, кыйла талаш-тартыштар жүз берди. Ошондой эле быйылкы пландалып жаткан иштерди толугу менен ишке ашыруу талабы айтылды. Анткени өткөн жылдагы пландалган иштердин 67 миллион сомдук көлөмү бүтпөй быйылкы жылга өткөнүн да баса белгилешти.

Бүбүсара ОРОЗАЛИЕВА, “Аймак”