2,032 Бардыгы /

ОШ. 1-мартта Улуттар биримдиги элдик париясынын Саясий кеңешинин кезектеги отуруму болуп өттү. Аны партиянын төрагасынын орун басары Бейшенбек Болотбеков жетектеди. Бул тууралуу Алтынай Арстанбекова билдирди.

Отурумдун алкагында партиянын Саясий кеңешинин курамына өзгөртүүлөр киргизүү; Ош, Баткен, Жалал-Абад областары боюнча координатордун жана партиянын Аткаруу комитетинин катчысынын маалыматтарын угуу маселелери каралды. Ошондой эле, партиянын ишин жер-жерлерде күчөтүү, жаңыча, тынымсыз иш алып баруу боюнча чаралар, сунуштар талкууланып, тиешелүү чечимдер кабыл алынды.

Партиянын аткаруу комитетининин катчысы, саясий илимдердин кандидаты Мирзаматов Рысбек Мамыровичтин маалыматы угулду жана анын жеке шарттардан улам катчылык кызматынан четтеп, мындан ары Саясий кеңештин мүчөсү катары иш алып баруу жөнүндөгү сунушу бир добуштан канааттандырылды.

Аткаруу комитетинин жаңы катчысы болуп, белгилүү укук таануучу, юридика илимдеринин кандидаты Сооронкулова Клара Сыргакбековна бир добуштан шайланды.

Ош, Баткен, Жалал-Абад областары боюнча координатордун маалыматы угулуп, талкууга алынды жана башка областтарда иш аткарып жаткан координаторлордун маалыматтарын да угуу жагы сунуш кылынды.

Саясий кеңештин курамын толуктоо маселеси кызуу талкуу жаратты. Натыйжада, партиянын Ысык-Көл, Тоң райондору жана Балыкчы шаары боюнча координатору Жоошбаев Мелис Ишебаевич, Талас областы боюнча координатор Жолдошбеков Бактыбек Абдылдабекович жана окумуштуу, коомдук ишмер Кайыпов Сулайман Турдуевич Cаясий кеңештин мүчөлөрү болуп шайланышты.

Отурумда ар тараптан жаңылануу, учурдагы коомдук-саясый шарттардын талаптарына шайкеш иш алып баруу, иш-аракеттердин узгүлтүксүз жүрүшүн камсыз кылуу, партиянын максат-мүдөөсүн, стратегиясын элдин кеңири катмарына жеткизүү маселелерине өзгөчө басым жасалды. Коомдук-саясый турмушка активдүү катышуу, партиянын программасында көрсөтүлгөн багыт жана тармактар боюнча өлкө мыйзамдарына ылайык, талыкпай иш жүргүзүү зарылдыгы белгиленди. Партиянын жер-жерлердеги жооптуу кызмакерлеринин маалыматтары угулуп, алардын кызуу талкууланышы, Аткаруу комитетинин жетекчилигинде жана Саясий кеңештин курамында болгон кадрдык жаңылануулар партиянын саясий ишмердигинин жаңы баскычка көтөрүлүшүнө жасалган ишенимдүү кадамдар катары бааланды. Отурум баштан-аяк, адилеттүүлүк, мекенчилдик, бекем саясый позиция, ачык-айкындуулук руху астында өттү.

“Аймак”