1,756 Бардыгы /

Amnesty International эл аралык укук коргоо уюму Душанбени тажик оппозициясынын лидерлеринин бири Шарофиддин Гадоевди тез арада бошотууга чакырды.

Уюм 28-февралда Тажикстандын башкы прокурору Юсуф Рахмондун атына расмий кат жөнөттү. Анда укук коргоочулар Гадоевдин Москвада кармалып, мажбурлап Тажикстанга кайтарылганына тынчсыздануусун билдиришкен. Кайрылууда Нидерландда мыйзамдуу жашап жүргөн оппозициячы буга чейин бир нече жолу Тажикстанга кайтып барбай турганын айткандыгы белгиленген.

«14-февралда Гадоев Москвада кармалып, эртеси анын Душанбеде экени белгилүү болгон. Бир күн үй камагында тургандан кийин аны ИИМ кызматкерлери алып кетишкен. Эгер ал Тажикстандын укук коргоо органдары тарабынан кармалып турса жана анын кылмыш кылгандыгынын далилдери жок болсо, анда ал эл аралык укуктардын нормаларына ылайык тез арада бошотулушу керек», — деп жазылган уюмдун катында.

15-февралда Тажикстандын Ички иштер министрлиги (ИИМ) Шарофиддин Гадоев өз эрки менен мекенине кайтып келгенин билдирген. Көп өтпөй социалдык түйүндөрдө анын шериктерин Тажикстанга кайтууга үндөп жатканы тартылган видеокайрылуусу да пайда болгон. Бирок Тажикстандын оппозициялык альянсы алгач Москвага чакырылган Шарофиддин Гадоевди тажик атайын кызматы Душанбеге уурдап кеткенин билдирүүдө. Учурда оппозициячынын кайсыл жерде экендиги белгисиз.

Шарофиддин Гадоев 2015-2016-жылдары оппозициялык «Группа 24» кыймылын жетектеген. Чет өлкөлөрдө жашаган тажик оппозициясынын өкүлдөрүнөн турган кыймыл Тажикстанда экстремисттик деп табылып, анын ишмердүүлүгүнө тыюу салынган. Нидерландда жашаган Гадоев 2016-жылы «Реформа жана Тажикстандын өнүгүүсү» деген кыймыл түзгөн. Ал Тажикстанда тыюу салынган Ислам кайра жаралуу партиясынын лидери Мухиддин Кабири жетектеген «Тажикстан улуттук альянсынын» бир бөлүгү болуп калган.

www.