1,773 Бардыгы /

ИНДИЯ. Кыргызстандагы жогорку окуу жайлардын медицина факультеттерин ийгиликтүү аякташкан бүтүүчүлөр Хайдарабад шаарында (Теленгана штаты) экинчи ирет жыйналышты.

Ошентип,бул чогулушта Кыргызстандагы ЖОЖдун медициналык факультеттерин ийгиликтүү бүтүрүшкөн эки миңден ашуун ак халатчандар ушул тапта Индиянын мыкты ооруканаларында жана медициналык мекемелеринде ийгиликтүү эмгектенишип, а түгүл бул өлкөнүн Теленгана, Махараштра, Чатисгарх, Ражастан, Керала жана башка мамлекеттик ооруканаларында жогорку кызматтарды ээлеп жүрүшкөндүгү ачыкталды.  

Баяндамачылар – дасыккан доктурлар Кыргызстанда окуган жылдарын абдан жылуу жана чоң ыраазычылык менен эскеришти. Айрыкча, бул өлкөдө алган татыктуу билимдеринин негизинде медициналык тармакта «мыкты адистер» аталашып, элдин кызыкчылыгы үчүн тынымсыз иштеп жатышкандыгын дагы моюндашты. Ошондой эле Кыргызстандын ЖОЖдорунун медициналык факультеттериндеги билим берүүнүн эң жакшы сапатын дагы өзгөчө белгилешти.

 Индиянын Хайдарабад шаарындагы иш-чарага Кыргыз Республикасынын Индиядагы Элчилигинин, Иса Ахунбаев атындагы Кыргыз Мамлекеттик медицина Академиясынын, Эл аралык жогорку медицина мектебинин, Казакстан жана Грузиянын медициналык жогорку окуу жайларынын өкүлдөрү, ошондой эле 2004-жылдан бери Кыргыз Республикасында билималышкан Кыргызстандын ЖОЖдорунун медицина факультеттеринин 250дөн ашуун бүтүрүүчүлөрү дагы катышышты.

                   Баса, Кыргызстандагы жогорку окуу жайлардын медицина факультеттерин аяктаган бүтүүчүлөрдүн Индиядагы Бирикмесинин негизги мүдөөсү жалпы кызыкчылыктары менен бириккен бүтүрүүчүлөрдүн өз ара аракеттенүүсүн, кызматтык жана достук байланыштарды түзүүсүн, бүтүрүчлөрдүн ар кандай демилгелерин колдоону, биздин өлкөлөрдүн арасындагы дагы бир платформа жана достук көпүрө болууга багытталган клубдун спектрин кеңейтүүнү гана көздөйт.

                   Алишер ТОКСОНБАЕВ, өз кабарчыбыз