1,452 Бардыгы /

Казакстандын мажилис депутаттары үч жылдык республикалык бюджет тууралуу мыйзам долбоорун жактырып, Казакстандын биринчи президенти Нурсултан Назарбаевдин канцеляриясына бир миллиард теңге бөлүү сунушун колдоду.

4-апрелде сенат өлкөнүн үч жылдык бюджети тууралуу мыйзам долбоорун кайра иштеп чыгуу үчүн мажлиске кайтарган. Анда ага Элбашынын канцеляриясынын чыгымдарын, ошондой эле айрым мамлекеттик кызматкерлердин айлыгын көтөрүүнү 1-июлдан 1-июнга жылдырууга жана Астананы Нур-Султан деп өзгөртүүгө кетчү чыгымдарды кошуу сунушталган.

Мажилистин Каржы жана бюджет комитетинин мүчөсү Серик Кусаиновдун айтымында, бул максаттар үчүн бюджеттен 38 миллиард теңге бөлүнөт. Мажилис депутаттары мыйзам долбоорун талкуулабастан эле бир добуштан колдоп беришти.

Буга чейин өлкөнүн каржы министринин орун басары Татьяна Савельева Нурсултан Назарбаевдин канцеляриясын түзүүгө бир миллиард теңге (2,6 миллион доллар) сарпталарын билдирген.

Өлкөнү дээрлик 30 жыл башкарган Нурсултан Назарбаев быйыл мартта президенттик ыйгарым укуктарын токтоткон. «Биринчи президент — улут лидери жөнүндөгү» конституциялык мыйзамга ылайык, Назарбаевге өлкө тарыхында болуп көрбөгөндөй жеңилдиктер берилет: батир, дача, автоунаа, пенсия, мамлекеттик күзөт, банк эсептеринин, мүлкүнүн өмүр бою кол тийбестиги жана сот жоопкерчилигине тартылбоо укугу.

www.