2,703 Бардыгы /

11-январь күнү Жалал-Абад шаарындагы “Телтору” ат майданында КР Өкмөтүнүн Жалал-Абад областындагы ыйгарым укуктуу өкүлчүлүгү жана Жалал-Абад областтык Ички иштер башкармалыгынын демилгеси менен биргеликте «Көкбөрү» жана “Эр эңиш” улуттук спорттук оюну боюнча мелдеш өткөрүлдү. Максаты – кылмыштуулуктун алдын алуу, спорт аркылуу жаштарды, жалпы эле элди ынтымакка, биримдикке чакыруу жана Жалал-Абад областында жайгашкан мүмкүнчүлүгү чектелген балдар үйлөрүнө, жетим балдарга кайрымдуулук көрсөтүү болуп саналат
Иш-чарага Сузак, Базар-Коргон, Ноокен райондорунан жана Майлуу-Суу, Жалал-Абад шаарларынан 18 команда катышты. Иш-чара областтык Т. Тыныбеков атындагы филармониянын ырчыларынын коштоосунда болуп өттү. Аталган ат майданга 7 боз үй тигилди. Оюндарды областтык “Көкбөрү” федерациясынын президенти Бекболот Ибрагимов алып барды. Иш-чара кайрымдуулук акциясы менен коштолуп эки жерге урналар орнотулуп, каалоочулар каражаттарын салып жатышты. Иш-чарага өкмөттүн ыйгарым укуктуу өкүлү Ж. Төрөмаматов, ОИИБдин башчысы Ж.Жоробеков жана бир катар район-шаарлардын аким, мэрлери, айыл өкмөт башчылары, областтык мекеме-ишканалардын жетекчилери катышышты. Областтын ардагер чабендес-улакчыларына КР Өкмөтүнүн Жалал-Абад областындагы ыйгарым укуктуу өкүлчүлүгү калпак кийгизип, Ардак грамота тапшырды.
“Эр эңиш” оюнунда 70 килограмдык палвандар күч сынашып, жыйынтыгында Сузак районунун Кара-Булак айылынын палваны Азамат аттуу жаран жеңүүчү деп аталды.
“Көкбөрү” оюну толук аягына чыккан жок. Анткени Көк-Арт айыл өкмөтүнүн командасы менен Областтык ички иштер башкармалыгынын “Динамо” командасы чатакташып кетип, эки команда тең оюндан чыгарылды эле, оюндан чыккан команданын улакчыларына аламан улак чаап баштатылды эле ““Көкбөрү” федерациясынын президенти Бекболот Ибрагимов оюнду токтотуп салды. Кийинки оюн 23-фералда Сузак районунун биринчилиги үчүн 23-февралда өткөрүүгө КР Өкмөтүнүн Жалал-Абад областындагы ыйгарым укуктуу өкүлү Жусубалы Төрөмаматов “Алтын кыш” деген атайын программа кабыл алып, кышында ат оюндарын өткөруп туруу зарылдыгын айтты.
Өкмөттүн облустагы өкүлүнүн аппаратынын бөлүм башчысы Гүлзат Аширова комиссиянын эсептөөсү менен түшкөн акча каражаттын суммасы 354 миң 780 сом, ошондой эле 60 миң сомдук эмерек жана 50 миң сом которуу жолу менен түшкөнүн маалымдады.
Аталган комиссия мүчөлөрү маалымат жыйын өткөрүп Жалал-Абад шаардагы психоневрологиялык мекемеге, Октябрскидеги балдар үйүнө жана социалдык коргоого муктаж мекемелерге акча каражатын болүштүруп тапшырды.

Орозалы Карасартов, “Аймак”