2,995 Бардыгы /

ЖАЛАЛ-АБАД. Бүгүн, 9-май күнү Жалал-Абад шаарында «Өлбөс полк» жүрүшү болуп, ал «Жеңиш» сейил багында Улуу Жеңиштин 74 жылдыгына арналган майрамдык салтанаттуу иш-чара менен уланды.

Иш-чара Жалал-Абад шаарындагы Эркиндик аянтынан, Ленин көчөсүндөгү областтык соттун имаратынын жанынан жана Т.Тайгараев айкелинен үч тараптуу келген «Өлбөс полк» жөө жүрүшү менен башталды. Анда Улуу Ата Мекендик согуштун катышуучуларынын урпактары каза болгон ата-бабаларынын сүрөттөрүн көтөрүшүп, шаардын борбордук көчөлөрүнөн «Жеңиш» багын көздөй келишти.

“Улуу Ата Мекендик согушка менин абам катышкан. Мурун тирүү кезинде андан согушту көргөнсүз, окуялардан айтып бериңизчи, немецтер кандай болот?”- деп сурай берчү элем. Өзүм аскер кызматындагы адаммын. Бул багытка келишиме да ушул абамдын түздөн-түз салымы чоң. Быйыл “Өлбөс полк” жөө жүрүшүнө  биринчи жолу сүрөтүн алып чыктым. Былтыры сүрөтүн авамдын балдарынан сураштырып издеп, эски сүрөт болсо да чыгартырып сыймыктануу менен бүгүнкү иш-чарага катышып олтурам” –дейт иш-чаранын катышуучусу Жаныбек Кулматов.

Улуу Жеңиштин 74 жылдык майрамдык салтанаттын катышуучулары согушта курман болгон жалал-абаддык жоокерлердин жаркын элесине арналып тургузулган эстелик менен өчпөс отко гүлчамбарларды коюшту. Андан соң салтанаттуу иш-чара КРдин гимни менен башталып, асманга ок атылды.

Иш чаранын официалдуу бөлүгүн Жала-Абад шаарынын мэри М.Тагаев алып барды. Андан соң өкмөттүн областтагы өкүлү К.Сатыбалдиев, шаардык кеңештин төрагасы А.Жолдошов, согуш ардагери Гаффан Сафин жана облустук ардагерлер кеңешинин төрагасы С.Качкынбаевдер кезек менен сөзгө чыгып, Улуу Жеңиштин 74 жылдык майрамы менен жалпы журтту куттуктап өтүштү.

Салтанаттуу иш-чаранын экинчи бөлүгү облустук филармониянын ырчыларынын, студенттердин, мектеп окуучуларынын коштоосунда концерттик программа менен коштолду.

Ал эми иш-чаранын аягында согушка катышкан ардагерлерге аскердик ботко тамагы берилди.

Бүбүсара ОРОЗАЛИЕВА, “Аймак”